БНСУ-ын иргэн нэгэн эрэгтэй цэрэг татлагаас бултахын тулд зориудаар их хэмжээгээр идэж, хэт таргалсан ч цэргийн албаа ном журмаар нь хаана хэмээн амлаж, шоронд хоригдох ялаас мултарсан байна. Хувийн мэдээллийг нууцалсан түүнийг Сөүлийн шүүх тус улсын Цэргийн албаны акцыг зөрчсөн гэж үзэн нэг жил хорих, хоёр жил тэнсэн харгалзах ялаар шийтгэхээр төлөвлөөд байжээ.

Энэ сарын 13-нд гарсан шүүхийн тогтоолд яллагдагч нь өнгөрсөн жилийн цэрэг татлагын үзлэгээр орохдоо 102 кг жинтэй байсан тул цэргийн жинхэнэ алба хаах үүргээс чөлөөлсөн бөгөөд калори ихтэй хоол хүнс хэрэглэж, хоногт идэх хоолныхоо хэмжээг хоёр дахин нэмж, биеийн хүч шаардсан ажил хийхээс зайлсхийж, үзлэгт орохын өмнө их хэмжээний ус ууж, жингээ санаатайгаар нэмж байсан нь тогтоогдсон тул дээрх шийдвэрийг гаргасан гэжээ. Гэхдээ яллагдагч нь цэргийн албаа биеэр заавал хаах хүсэлтээ илэрхийлснээр шүүхийн шийдвэрийг хүчингүй болгосон гэж CNN мэдээлэв. Харин түүнийг жингээ нэмж, цэргийн албанаас бултахыг зөвлөж, байнга зоригжуулж байсан гэх найзыг нь зургаан сар хорих, нэг жил тэнсэн харгалзах ялаар шийтгэсэн байна.

Солонгосын дайнаас хойш Өмнөд Солонгосын 28 нас хүртэлх насны эрэгтэй иргэн бүр хамгийн багадаа 18 сар цэргийн алба хаах үүрэг хүлээдэг болсон юм. Гэтэл цэргийн алба хаах сонирхолгүй иргэд үүргээ биелүүлэхээс татгалзсаны улмаас шоронгийн хаалга татах явдал жилээс жилд олшрох болсон байна. Гэхдээ тэдний олонх нь шашны шалтгаанаар цэрэгт явахаас татгалздаг гэж Эмнести Интернешнл тайландаа онцолжээ.

Өмнөд Солонгосын урлаг, спортын одод цэргийн алба хааж, замналаа түр завсарлах явдал түгээмэл байдаг бөгөөд нэгэн жишээ татахад К-попын гоц үзэгдэл болсон BTS хамтлагийн 2022 онд цэргийн алба хаахын тулд мөн адил завсарлага авч байлаа.

Сонирхуулахад 2018 оны судалгаагаар тус улсын 20-иод насны эрэгтэйчүүд 72% нь цэргийн албанд татах нь жендерийн ялгаварлал гэж үздэг бол эмэгтэйчүүдийн 65% нь эмэгтэйчүүдийг ч гэсэн цэрэгт татах ёстой гэж үзсэн бол судалгаанд оролцсон хүмүүсийн 83% нь боломжтой бол цэргээс бултах нь зөв, 68% нь цэргий албыг цаг гарзадсан явдал гэж үзэж байжээ.