Асашёрюү Дагвадорж, UFC-ийн Конор МакГрерог хоёрыг зүйрлэчихмээр ч юм шиг. 
Яаж байна гэхээр, мэргэжлийн тулааны дэвжээг эзэгнэж, алдар суу нь мандсан Конор МакГрегор цөстэй ирланд эрчүүдийн эр бярыг гайхуулж явсан. Атал одоо Ирландад түүн шиг хүний адаг алга. Аль 2018 онд үйлдсэн хүчингийн хэрэг нь илэрч нүүр хийх газар олдох нь байтугай, хаашаагаа харж үхэхээ ч мэдэхгүй явна, тэр.

UFC-ийн аварга залуугийн өөдгүйд эгдүүцсэн хамтрагчид нь түүнд мөнгө өгөхөө больж, ирландчууд бүгдээрээ нүүр буруулж байна. Гуйлгачнаас гудиггүй баян болсон тамирчин залуугаар нүүр царайгаа хийсэн дэлхийд алдартай брендүүд холбоогоо тасалж, дахин хамтрахгүй гэж мэдэгдлээ. Хэвлэлүүдээр хүртэл түүнийг нар үзүүлэхгүй муулж байна. Мэргэжлийн тулааныг ирландад оруулж ирсэн боловч тэндхийн спорт, биеийн тамирыг бусниулж орхисон бурууг ч түүнд тохно.

Ирландын Үндэсний лааны тосон музей үнэ цэнтэй, нэр төрөө сайн авч явдаг эрхэм хүмүүсийг хүндэтгэдэг учир Конор МакГрергорийн лааны тосон баримлыг үзвэрийн тавцангаас зайлуулжээ. Скалли фитнессийн хананд Конор МакГрерогийн зураг байсныг ч хуулж хаясан байна. Уг нь, фитнессийн эзэн Гари Скалл Конорыг ухаантай, сайн залуу гэж боддог, шүтэн биширдэг байсан болохоор ханандаа мөнхлөн алдаршуулж байсан юм. Олон жил тулаанаар хичээллэсэн хар мунаг эр турьхан эмэгтэйд хүч хэрэглэсний хариу ирландчууд ёстой нэг сайн барьсаар байна.

Ингээд Конорын хувьд замнал нь бараг нурж дуусаж байх шиг байна. Гэхдээ манайд байгаа Дагвадорж гэж “сайхан гар” харин ч эсрэгээрээ мандаад байх шиг. Нэг л буруу тогтолцоо энд үйлчлээд байна. Хувь хүний харакерийн хувьд авах юмгүй тэр нөхрийн зодоон цохионы паян дуусахгүй. Бүр улс, үндэстний хэмжээний соёл урлагийн салбарыг устгасан дайсан гэвэл зохино. 

Циркийг 2008 онд хувьчилж авснаас хойш түүний нэр хүнд навс унасан. Монголчуудыг цирк үзэх юмгүй болгож орхисон юм чинь, аргагүй биз. Аса аваргаас нэхэх зүйл олон ч хамгийн нэгдүгээрт хөндөх асуудал нь цирк. Циркээ нүдэнд үзэгдэх, гарт баригдах юмтай болгочихвол дараа, дараагийн асуудлыг хөндөж, хариуцлага нэхэмз. Болж өгөхгүй бол нийтээрээ бойкотлох гэж нэг юм байдаг. Авгай, хүүхнээ зодож нүдэж хүчирхийлдэг нь ч дараагийн асуудал. Найр, наадам хэсэж, аль таарснаа барьж авч зоддог нь ч бас дараагийн хэрэг. 

“Дээр үед оросууд Ноён уулыг ухаад манай нэг хивсийг аваад явсан гэсэн. Тэрийгээ авах юм сан даа” гэдэг шиг циркээ нэг үзчих юм сан даа, Дагвадорж оо! Гол нь, циркээ ашиглалтанд оруулаад нээгээд өгчихөөч дээ гэж мөн ч их гуйсан даа, сүүлийн хэдэн жил. Чихгүй юм шиг явж, явж аль долоодугаар сард, наадмын өмнө цирк нээлтээ хийнэ гэсэн. Бас л хойшилж аравдугаар сар гэсэн. Нээлт хийх өдөр нь дөхөөд ирэхээр бас л хойшлуулж, арваннэгдүгээр сард гэсэн. За, тэгээд дуншиж, дуншиж чүү чай нээсэн чинь кивигийнхэн очоод тоглолт хийчих юм. Өөр хэн, хэн очиж циркийн тайзан дээр салбаганах гэж байгааг хэн мэдэх вэ. Өнөө сайхан Монгол хүчтэн, уран нугаралт, агаарын акробат, баавгайтай бүжиг, алиалагчдын хөгжилтэй наргиан, амьсгаа дарж, зүрх булиглуулам эрсдэлтэй үзүүлбэрүүд хаа байна?!

“Зэ цэг коом арена” гээд хаяг наачихсан үндсэн үйл ажиллагааг нь алдагдуулсан шилэн шовгор болгочихсон. Циркийг ашиглалтанд оруулаад өгөөч гэсэн үү, циркийн байранд шоу цэнгээний газар байгуулаадах гэсэн үү? Анх хувьчилж авахдаа гэрээгээр хүлээх үүрэг нь циркийн үйл ажиллагааг хэвийн явуулах, хэвийн ажиллах нөхцөл боломжийг хангаж өгөх гэдгийг дахиад нэг сануулчихъя!

Хүүхэн хүчиндсэн Конорыг ирландчууд тэнд хөөрхий болгож байхад, бүтэн цирк залгисан Дагвадоржийн толгойг илээг өнгөрөөх хэрэг үү. Анх 1.5 тэрбумаар худалдаж авахдаа “Дэлхийд гайхагдах цирк болгоно” гэж амласнаа яалаа даа?! Гэтэл циркийн барилгаас ч үнэтэй цаг аваад эхнэртээ зүүлгэчихдэг мөртлөө бүхэл бүтэн циркийн салбарыг гудамжинд гаргачихдаг л юм байна.