Япон төвтэй “Сайнс Ко” компани цоо шинэ технологи шингээсэн хүн угаалгын машинаараа ирээдүйд усанд орох зан үйлийг эрс өөрчлөхөөр шийджээ. Усан онгоцонд арьсаа дэвттэл удаан хэвтэх эсвэл шүршүүрт нуруугаа угаах гээд ядаж зогсох шаардлагагүй болох юм байна. Харин ч хиймэл оюун ухааны тусламжтайгаар ердөө 15 минутанд цасан цагаан болтлоо угаалгах нь. Угаалгын өрөөний шүршүүрийн толгой үйлдвэрлэдэг тус компани хүн угаадаг машинаа ойрын саруудад худалдаанд гаргахаар төлөвлөжээ. Ямартай ч 2025 оны дөрөвдүгээр сард болох Осака Кансай Экспод дэлгэрэнгүй танилцуулна гэж Асахи Шимбун мэдээллээ. Ингэхдээ тэд үзэсгэлэнгийн хугацаанд 1,000 зочинд үйлчилгээ үзүүлж, шинэ бүтээгдэхүүнийхээ ид шидийг гайхуулах гэнэ.

Хүн угаалгын машины шинэ дизайн нь сөнөөгч онгоцны нисгэгчийн бүхээгтэй төстэй, дан шилэн гадаргуутай, ар талаараа онгойдог байх юм. Хэрэглэгч голын суудал дээр суумагц машин автоматаар халуун усаар дүүргэнэ. Мэдрэгч төхөөрөмжүүдийн тусламжтайгаар усны температурыг тохируулж, аюулгүй байдал, ая, тав тухыг хангаж өгөх зарчимтай. Хэрэглэгчийн сэтгэл хөдлөлийн төлвийг хиймэл оюун ухаант системээр шинжлэн дүгнэж, нэвт харагддаг шилэн гадаргууд тайвширсан царай бүхий зураглалаар харуулна.

Энэ санааг хамгийн анх Санёо Электрик Ко буюу та бидний мэдэхээр Панасоник 1970 онд Японы дэлхийн үзэсгэлэн дээр танилцуулж байсан ч тэгсхийгээд мартагдсан юм. Энэ ч утгаараа компанийн захирал Ясуаки Йояма хүүхэд насандаа харсан хамгийн гайхам бүтээлийг санагалзан энэ төсөлд онцгойлон анхаарал хандуулж байгаа гэлээ.