Хэдийгээр эх, үрийн тангараг тасарсан ч гэлээ алдарт дуучин Эминемийг олон алдартай дуугаа бичихэд хүргэсэн Дебби Нельсон уржигдар 69 насандаа нас баржээ. Эминемийн бие төлөөлөгчөөр удаан ажиллаж буй Деннис Деннехи дээрх мэдээллийг үнэн гэж баталгаажуулсан боловч үхлийн шалтгааныг нь тодорхой тайлбарласангүй. Гэхдээ Дебби Нельсон нь уушгины хорт хавдартай байсан гэж CNN мэдээлжээ.

Д.Нельсон 1955 онд Канзасын нэгэн цэргийн баазад төрсөн бөгөөд гэр бүлийн хүчирхийлэл дунд өссөн бөгөөд хүүтэйгээ харилцаа муутай нь нууц биш байсан юм.

Эминем 2002 онд гаргасан “Cleaning Out My Closet” дуундаа ээжийнхээ эмэнд донтсон бодит үнэнийг дуулж, хэт доромжилсон утга агуулсан нь тэдний харилцааг улам хөндийрүүлсэн гэж үздэг. Энэ ч утгаараа ээж Дебби Нельсон нь хүүгээ нэр төрд нь халдсан гэж буруутган шүүхдэж байсан удаатай.

Дебби Нельсон 2008 онд “Миний хүү Маршалл, миний хүү Эминем” нэртэй ном гаргаж, түүндээ реппер залуугийн бага насны амьдралын талаар маш дэлгэрэнгүй бичиж, хүүтэйгээ хэчнээн ойр дотно байснаа дурсаад Эминемийг сайхан цагуудаа мартсан гэж буруутгасан байлаа.