Марвел студийн алдартай бүтээлүүдийн нэг “Локи” цувралд Хүүхэд Локигийн дүрд тоглосноор нь кино үзэгчдийн сайн мэдэх болсон жүжигчин Жек Вийль олон нийтэд хандан тусламж гуйжээ. Учир нь, 17 настай жүжигчин маань олон кинонд тоглож алдаршсан ч гэлээ гэр бүлийн хүчирхийллийн золиос болж, очих газаргүй гудамжаар хоног төөрүүлэн яваа хэмээн ТикТокоор дамжуулан үзэгч, фенүүдэдээ зовлонгоо учирлажээ. Тусламж гуйсан бичлэг дээрээ Ж.Вийль биет болон сэтгэл зүйн хүчирхийллийн улмаас сэтгэцийн эрүүл мэнд нь муудсан. Аутизм, ADHD-тэйн дээр хоёр туйлт болон дэмийрэх өвчний шинж тэмдэг илэрч эхэлсэн гэжээ. Мөн өвөө нь эдгэршгүй өвчтэй, биеийн байдал нь муу байгаа учир өвөө, эмээгийндээ очиж чадахгүй тул туслаач гэж гуйсан байна.

Тэрбээр энэ талаараа хэд хэдэн бичлэг хийж, ТикТокт оруулсан бөгөөд өөр нэгэн бичлэг дээрээ нийгмийн халамжийнхантай холбоо тогтоосон боловч тэд насанд хүрээгүй жүжигчинг авч хэлэлцээгүй гэнэ. Гэхдээ хамгийн сүүлд хийсэн бичлэг дээрээ нийгмийн халамжийнхан эхний бичлэгийг үзээд холбоо барьсан боловч халамжийн газар олж өгөх хүртэл гудамжинд амьдрахаас өөр сонголтгүй болжээ. Гэхдээ тэрбээр сүүлийн бичлэг дээрээ хэд хоног найзындаа байрлахаар болсноо мэдэгдээд өөрт нь урмын үгс хайрласан сэтгэгдэл бичиж, гэртээ урьсан сайхан сэтгэлт фенүүдэдээ талархал илэрхийлсэн байна.

Жек Вийль нь Локи цувралын хоёр ангиас гадна “The End of the F***ing World”, “The Peripheral” зэрэг арав гаруй кинонд гол болон туслах дүр бүтээжээ.