Ердөө сар хүрэхгүй хугацааны өмнө 88 мянган ам.доллароос давж түүхэн өсөлтөө үзүүлээд байсан биткойны ханш анх удаа 100 мянган ам.долларт хүрлээ. Ингэснээр АНУ-ын Ерөнхийлөгчийн сонгуулиас хойш 45 хувиар өссөн анхны криптовалют болсон байна. Он гарснаас хойш биткойны үнэлгээ хоёр дахин нэмэгджээ.

АНУ-ын Ерөнхийлөгчөөр сонгогдсон Дональд Трампын засаг захиргаа крипто валют болон крипто зах зээлийн эсрэг эерэг бодлого баримтлах хүлээлт байгаа тул ийнхүү биткойн тэргүүтэй криптовалютуудын ханш өсөөд байна. Дональд Трампын хувьд АНУ-ын Үнэт цаас, биржийн хорооны даргаар Пол Аткинсыг томилохоо зарласнаас хойш арилжаачдын дунд эерэг төсөөлөл давамгайлах болсон юм.

Дональд Трамп Ерөнхийлөгчийн сонгуулийн кампанит ажлын үеэр крипто тэр дундаа биткойноор хөрөнгө оруулах, худалдааны харилцааг бий болгож, криптовалютын эргэлтийг бий болгоно гэж удаа дараа мэдэгдсээр байсан юм. Ялангуяа ирэх онд Үндэсний биткойны нөөц бүрдүүлэх, крипто гүйлгээнд татвар ногдуулахгүй байх зэрэг олон эерэг санаачилга гаргаж болохыг санхүүгийн томоохон агентлагууд мэдээлсээр байна.