Нийслэл болон Дархан-Уул, Завхан, Ховд, Төв, Сэлэнгэ, Хэнтий, Увс, Өмнөговь, Дорноговь, Дорнод аймагт байрлах томуугийн харуулдан тандах эмнэлгүүдээс энэ сарын 16-22 хооронд цуглуулсан 474 хүний хамар, залгиурын арчдасын дээжээс томуу, корона, синтициал вирус илрүүлэх шинжилгээг Томуугийн үндэсний төв хийжээ. Тандалтанд хамрагпсан 474 хүний 218 буюу 46%-иас эмгэг төрүүлэгч илэрсэн байна.

Шинжилгээний явцад:
• 106 сорьцноос томуугийн A хүрээний H1N1 вирус,
• 107 сорьцноос синтициал вирус,
• 5 сорьцноос корона вирус,

Хүн амын дунд эдгээр вирус тархаж, амьсгалын замын хүнд өвчин үүсгэж, эмнэлэгт хэвтэхэд хүргэх гол шалтгаан болж байгааг эмч, мэргэжилтнүүд анхаарууллаа. Үүнээс гадна томуу, томуу төст өвчин үүсгэгч илрүүлэх шинжилгээг түүвэр 64 сорьцонд хийхэд 21-ээс нь эмгэг төрүүлэгч илэрчээ.

• 9 сорьцноос риновирус
• 3 сорьцноос аденовирус
• 5 сорьцноос синтициалвирус
• 1 сорьцноос томуугийн иж вирус
• 3 сорьцноос метапневмовирус

Ханиадын халдвартай өвчтөнүүдийг санамсаргүйгээр сонгон авч шинжлэхэд гарсан үр дүнгээс авч үзэхэд дээрх вирусууд хүн амын дунд хэдийн тархсан гэсэн үг. “H1N1” вирус генийн бүтцийн хувьд гахай, шувуу болон хүний томуугийн генийн аль, алийнх нь шинж тэмдгийг агуулсан эрлийз хэлбэрийн вирус байв. Томуугийн А хүрээний H1N1 вирус 2009 онд дэлхий нийтээр дэгдэж, цар тахлын хэмжээнд хүрч байлаа. Анх Мексик улсад гахайн фермийн гахайнаас энэ вирус хүнд халдсан гэж судлаачид үздэг. Ингээд хүнээс хүнд дамждаг болж, нийт 200 гаруй оронд тархан, хүний томуугийн вирус болж хувирсан юм.

Энэ вирус 99 хувийн халдвартай гэж үздэг. Хүнээс хүнд агаар дуслын замаар дамжиж халддаг учир маш богино хугацаанд олон хүнийг хамран өвчлүүлдэг. Амьсгалын эрхтнээр дамжин, хүний цусанд орж, уушги, хоолойноос гадна бүх эрхтэн тогтолцоонд нөлөөлдөг.