1999 он. Тухайн үед 55 настай байсан Наоко Нишимото “Mazda RX-7” загварын спорт машин худалдан авч бүтэн 25 жилийн турш унаж, эдэлжээ. Төдийгөөс өдий хүртэл өвөрмөц дугаартай, хайртай унаагаа маш хашир унасаар ирсэн бөгөөд саяхан буюу 2024 оны арванхоёрдугаар сарын 18-нд тохиосон 80 насны төрсөн өдрөөрөө нэгэн өвөрмөц шийдвэр гаргасан нь дэлхий дахины анхаарлыг татаж, хайр бишрэлийг төрүүлээд байна.

Олныг гайхашруулсан тэрхүү өвөрмөц шийдвэр нь жолоочийн эрхийн үнэмлэхээсээ татгалзаж, RX-7 машинаа Мазда компанид сайн дураараа буцаан өгөх гэвэл хэн ч гайхна.

Маздагийн үнэнч үйлчлүүлэгч эмгэний тухай мэдээлэл өнгөрсөн есдүгээр сард Ютүбд орсноор нэгэн сонирхолтой намтар түүх түмний сонорт хүрсэн аж. Маргааш нь л Наоко гуайд аз жаргал, эрүүл энх, сайн сайхныг хүссэн 400 гаруй и-мэйл ирсний дотор Мазда компанийн Олон нийттэй харилцах албаны и-мэйл багтжээ.

И-мэйлд бичсэнээр 80 настай Наокогийн тухай нэвтрүүлгийг үзсэн Маздагийн инженерийн сэтгэл хөдөлж, нэн даруй компанийн Олон нийттэй харилцах албаныхантай холбоо барьсан байна.

Наоко Маздагаас ирсэн и-мэйлийг уншиж үзээд “Амьдралдаа сонсож байгаагүй урмын үгс уншиж, хүний чин сэтгэлийг мэдрүүлсэн нь миний хувьд гэгээ туссан баяртай явдал боллоо” хэмээн инээмсэглэн ярьж сууна.

Ингээд тэрбээр 25 жил нөхөрлөсөн итгэлт нөхөртэйгээ салах ёс хийхийн өмнөхөн хүү Макотогоо дагуулан сакура дэлбээлэхийг харахаар замд гарчээ.

Сонирхолтой нь, Наоко, Макото нар “Initial D” нэртэй аним үзэж байгаад анх Маzda RX-7 машиныг хараад худалдаж авах хүсэл төрсөн байна. Наоко тэр даруйдаа хамгийн ойрын Маздагийн салбар дэлгүүрт очиж захиалга өгснөөр шохоорхсон машинаа 3.9 сая иенээр худалдан авч Газрын тээврийн товчооноор машины загварт нийцүүлэн “7” дугаар авснаар арчаатай жолооч, найдвартай төмөр хүлэг хоёрын түүх эхэлсэн юм.

Наоко Нишимотогийн 80 насны төрсөн өдрөөр Нагасаки дахь Маздагийн салбар дэлгүүрт нэгэн гайхамшигтай ёслол зохион байгуулжээ. Наоко гуай 25 жилийн итгэл унааныхаа түлхүүрийг буцаан гардуулж өгөхдөө гүн талархал илэрхийлээд:
“Өнөөдөр би энд ирэхдээ хайртай “Долоо” дугаартаа жолоодож ирсэн ч буцаад ганцаараа харина. Энэ машин миний амьдралын 25 жилийг найдвартай үүр гарсан. Сэтгэл хангалуун байгаа учраас салах ёс хийхдээ харамсах зүйлгүй. Хайртай “Долоо”-доо сүүлчийн нэг л зүйл хэлмээр байна. Баяраллаа. Гайхамшигт 25 жилийг бэлэглэсэнд баярлалаа.” хэмээн сэтгэгдлээ хуваалцжээ.

Наоко гуай энэ хугацаанд RX-7 машинаараа 77,592 км зам туулсан ч бараг л шинээрээ юм шиг арчилж, тордож иржээ. Тэгэхээр уг машиныг Йокохама дахь Маздагийн судалгааны төв рүү илгээхийн өмнө Хирошимад анх удаа автын үзлэгээр оруулах гэнэ. Түүний дараагаар зорьсон газраа хүрээд олон нийтийн харилцааны үзэсгэлэнд тавигдаж, олны хүртээл болж, олон сайхан түүхийг өгүүлэх нь.

Наоко гуай машиныхаа түлхүүрийг гардуулан өгсний дараа орон нутгийн цагдаагийн газарт очиж, жолоодох эрхийн үнэмлэхээ хураалгасан байна.

Энэ түүх нь энгийн нэг машины тухай биш харин жолооч хүний хүсэл эрмэлзлэл, тэмүүлэл, унаагаа хайрлаж, арчилж тордохын тод жишээ боллоо хэмээн Маиничи Шимбунд сайшаан бичсэн байна.