Загалмайн шашинтнуудын хамгийн том баяр болох Зул сарын баярын өмнөх өдөр өнөөдөр тохиож байна. Энэ өдөр АНУ-ын Ерөнхийлөгч Жо Байден 50 хуулийн төсөлд гарын үсэг зурж, хүчин төгөлдөр болгож баталсан нь онцлууштай явдал боллоо. Түүний баталсан хууль дотор Парис Хильтоны санаачилсан нөхөн сэргээх төвүүдэд амьдардаг өсвөр насныхныг хамгаалах хуулийн төсөл, коллежийн оюутны хуаран доторх мансууруулах бодисын хэрэглээтэй тэмцэх хуулийн төсөл, Конгрессийн гишүүн гэмт хэрэгт холбогдож, ял сонссон тохиолдолд тэтгэвэр олгохыг хориглох тухай зэрэг хуулийн төсөл багтжээ.

Хильтон сүлжээний өв залгамжлагч, загвар өмсөгч, дуучин гэдгээрээ алдартай Парис Хильтоны санаачилсан Асрамжийн газрын хүүхдийн эрхийг хамгаалах акцыг өнгөрсөн долоо хоногт АНУ-ын Сенат болон Төлөөлөгчдийн ордонд хэлэлцэж, дэмжээд байсан юм. Ингэснээр нөхөн сэргээх болон бусад төрлийн байгууллагуудын үйлчилгээ авч буй насанд хүрээгүйчүүдийн эрх, эрх чөлөө, эрүүл мэнд, аюулгүй байдлыг хамгаалж, халамж, эмчилгээ, амьдрах орчныг улам сайжруулах хууль, эрх зүйн орчин бүрдэж буйгаараа онцлогтой. Парис Хильтон нь өөрөө ижил зовлон туулсан тул өсвөр насныхны эрхийг хамгаалахад хувийн зүгээс ихээхэн хүчин чармайлт гаргасаар ирсэн юм.

Ирэх сарын дундуур албан үүргээ хүлээлгэж өгөх гэж байгаа Жо Байден сүүлийн үед маш олон шийдвэрийг дарааллан гаргаж, идэвхтэй ажиллаж байгаа билээ. Өнгөрсөн даваа гарагт цаазын ялтай 40 хоригдлын 37-д нь өршөөл үзүүлж, хуулийн дээд хэмжээг магадлангаар орох боломжгүйгээр бүх насаар нь хорих ял болгон өөрчилсөн юм. Мөн түүний өмнөхөн хүү Хантертаа бүрэн өршөөл үзүүлж, галт зэвсэг, авлигатай холбоотой хэргийг нь хэрэгсэхгүй болгож байлаа.