Башар Аль Ассадын гэр бүлийн жараад жилийн дарангуйллыг устгасан гэж баярлан хөөрөлдөж буй Сири улсад олонхын санаанд ороогүй ч учир мэдэх хүмүүсийн таамаглаж байсанчлан эргэлт гарах гэж байна. Учир юу вэ гэвэл сөрөг хүчнийхэнтэй нийлж, “цахилгаан дайн”-аар шахуу төрийн эргэлт хийсэн Хаят Тахрир Аль Шам бүлэглэлийнхэн угаас Аль Каидагийн нэг жигүүр байсан, Лалын улс бүлэглэлийн гишүүд гэдгээр нь дэлхий дахин мэднэ. Энэ утгаараа Сири улсын ерөнхий боловсролын системд шинэчлэлт хийсэн нь ард түмний дунд хүчтэй маргаан дэгдээгээд байна. Шинээр тогтсон засаг төрөөс дунд сургуулийн сургалтын хөтөлбөрийг шинэчлэх санал гаргаж, эхний ээлжинд танилцуулснаар Аллах бурханыг магтан дуулсан шашны чиглэлийн сургалтууд багтжээ. “Буяны мөр”, “Лалын шашны замнал” гэх зэрэг хичээлийг шинээр нэвтрүүлэхээр танилцуулсан нь Арабын ертөнцөд хамгийн ардчилсан тогтолцоотой байсан Сири улсыг Афганистаны талибуудын адил шашны хатуу хуультай улс болгох эхний алхам гэж олон улсын судлаачид тайлбарлаж байна. Хэрэв одоо ярьж буй сургалтын хөтөлбөрийг дунд сургууль нэвтрүүлж эхэлбэл хамгийн багадаа 10 жилийн дараа л гэхэд Сири нь Иран, Ирак, Афганистан тэргүүтэй бусад лалын шашинт орнууд шиг Шариатын хатуу хуультай, шашинд гүнд автсан улс болон хувирах магадлал өндөр байгаа юм. Шинэ сургалтын хөтөлбөрийг 6-18 насны бүх хүүхдэд заах бөгөөд  ирээдүйн экстремист улсын иргэдийг багаас нь бэлдэж, даранггуйллыг устгах нэрээр бүхэл бүтэн нэг нийгмийг хойш нь татсан явдал юм гэж учир мэдэх хүмүүс анхаарууллаа.