Нийгмийн сүлжээний аварга Мета компани Фейсбүүк, Трээдс, Инстаграм, УаттсАпп зэрэг платформ дээрээ гурав дагч талын баримт шалгагчдыг ажиллуулахаа больж, мэдээллийн үнэн, худлыг залруулах ажлыг хэрэглэгчдэд даатгаж, тэдний тухайн нийтлэл дээр үлдээсэн тэмдэглэлд үндэслэн хянан, шийдвэрлэдэг болно. Марк Цукерберг энэ мэдэгдлийг өчигдөр хийснээс хойш багагүй хэл ам татлаад байна. Учир нь, зарим талаас түүнийг удахгүй Ерөнхийлөгчийн тангараг өргөх Дональд Трамп болон түүний холбоотнуудын таашаалд нийцүүлэн ажиллах болсны илрэл гэж шүүмжилж эхэллээ.

Угтаа бол олон жилийн турш ашиглаж ирсэн баримт шалгах программ нь олон нийтийн сүлжээгээр ташаа, буруу, илтэд мушгин гуйвуулсан мэдээлэл тархахаас сэргийлж, хэрэглэгчдийн эрх ашгийг хамгаалахын төлөө ажиллаж байлаа. Гэхдээ ийнхүү эрс шинэчлэлт хийснээр хэрэглэгчид өөрсдөө буруу, зөрүү, худал мэдээлэл агуулсан нийтлэлүүдийг залруулах боломжтой болох бөгөөд улс төрийн агуулга бүхий нийтлэлүүдэд хандах хандлага илүү хувийн шинж чанартай болох давуу талтай гэж Мета компани үзжээ. Өөрөөр хэлбэл хэрэглэгчдэд үг хэлэх, үзэл бодлоо илэрхийлэх эрх чөлөөг олгож, үнэн, худлын аль нь болохыг илүү бодитоор жинлэх нөхцөл бүрдэнэ гэсэн үг хэмээн тайлбарлалаа.