Камбож үндэстнийг аврах намаас тус улсын парламентад орж ажиллаж байсан, сөрөг хүчний нөлөө бүхий улстөрч 73 настай Лим Кимъяа эхнэрийн хамт Тайландад дөнгөж ирээд байхдаа хөлсний алуурчны гарт амиа алдсан хэрэг өчигдөр гарлаа. Хэргийн газрын ажиглах камерт үлдсэн бичлэгээс харахад хөлсний алуурчин улс хоорондын автобуснаас дөнгөж буугаад байсан Лим Камъяаг отож байгаад гудамжинд буудан хөнөөжээ. Тайландын цагдаагийн газрын мэдээгээр хөлсний алуурчин гурван удаа гал нээж, Лим Кимъяа цээжин тус газартаа хоёр удаа шархдаж, шархаа даалгүй газар дээрээ нас барсан байна.

Хэрэг явдал гарсны дараа Камбожийн улстөрчид байр сууриа илэрхийлж, энэ улс төрийн аллагад Засгийн газар буруутай гэв. Камбож үндэстнийг аврах намын лидер Кем Сохагийн охин Моновитъя Соха хамтран зүтгэгчийнхээ амийг Камбожийн төр засгаас нэхэж, хариуцлага хүлээх ёстой гэж хатуу мэдэгджээ.

Тайландын цагдаагийн газар аллагыг мөрдөж, хөлсний алуурчинг ажиглах камерийн дүрсэнд тод үлдсэн төрхөөр нь таньж, эрэн сурвалжилж эхэлжээ. Эхний ээлжийн мэдээллээр Лим Камъяаг хөнөөсөн алуурчин нь Тайландын тэнгисийн цэрэгт офицер цолтой алба хаасан мэргэжлийн цэрэг бөгөөд одоогоор мотоциклиор таксин үйлчилгээ үзүүлдэг этгээд аж.