АНУ-ын Калифорнийн Лос Анжелос хотын эргэн тойронд гарсан хээрийн түймэр бараг унтраах боломжгүй болж, тус хотын захад хүрчээ. Дэлхий даяараа сайн мэдэх алдарт Холливууд бичгийг галаас хамгаалахын тулд аюулгүй газар руу зөөж эхэлсэн бол Оскарын нэр дэвшигчдийг тодруулах арга хэмжээг хойшлуулахад хүрчээ. Энэ хооронд нэр алдартай том оддын сая, сая долларын үнэтэй орд харш үнс нурам болтлоо шатаж, ихээхэн хохирол учруулаад байна. Тухайлбал, Холливуудын алдарт жүжигчин Бен Аффлек л гэхэд галын улмаас хамгийн их хохирол амсаад байна. Түүний Женнифер Лопезоос салсныхаа дараа худалдаж авсан Песифик Палайдес дахь харш 20 сая долларын үнэтэй байжээ. Зарим одод хэд хэдэн тансаг зэрэглэлийн харштай бөгөөд саяхан анх удаа Алтанбөмбөрцөг хүртсэн жүжигчин Деми Муур л гэхэд тав болон долоон сая долларын үнэтэй хоёр байшингаа галд алджээ.

Оскарын шагналт Жон Гүүдман - 15,000 акр буюу хөлбөмбөгийн таван талбайтай тэнцэх эдлэн газар түймрийн галд ганцхан минутийн дотор юу ч үгүй шатжээ. “Top Gun: Maverick” киногоороо бүр их алдаршсан Майлс Теллер болон түүний эхнэр Келей нарын 2023 оны дөрөвдүгээр сард худалдаж авсан мөрөөдлийн ордон нь шатаж, 7.5 сая доллар үнс нурам болж, юу ч үлдээгүй гэв. Америк бялуу киногоор алдаршсан Южин Левай жүжигчин мөн адил орох оронгүй боллоо хэмээн сошиал дахь албан ёсны хуудсаараа гашууджээ. Жүжигчн Билли Кристалын хувьд 1979 оноос хойш амьдарсан байшингаа алдсандаа тун их харамсаж буй гэв. Адам Бродти, Лейтон Мийстер нар ч долоон сая долларын харшнаас нь юу ч үлдээгүйд тун ихээр харамсаж байгаагаа илэрхийлжээ. “Аймшгийн кино” хэмээх инээдмийн киноны дүрээрээ алдартай Анна Фарисын хүлээсэн хохирол таван сая доллар. Хильтон сүлжээ зочид буудлын эрх охин Парис Хильтоны Малибугийн эрэг дэх тансаг харш ч бас байгалийн гамшигт өртжээ. Гэхдээ чухам хэдэн сая долларын хохирол амссаныг нь тодорхой мэдээлсэнгүй. Мөн Найзууд цувралын алдартан агсан Меттью Перригийн амьдарч байсан 8.5 сая долларын үнэтэй харш шатсан байна.

Галд үнэтэй үл хөдлөхөө алдсан оддын жагсаалт Сандра Лий, Рикки Лейк, Спенсер Пратт, Энтони Хопкинс, Жеймс Вүүдс, Марк Хамилл, Кмерон Матисон, Жейми Лий Куртис, Мариа Шривер гээд хэдэн арваараа үргэлжилж байна.