БНХАУ-ын Шаанси мужийн Пучен хотын Техникийн их сургуулийн оюутан энэ сарын 02-нд өндрөөс унаж амиа алдсан байдалтай олджээ. Орон нутгийн албаныхны мэдээлснээр гуравдугаар дамжааны оюутан Дан овогтын үхэл золгүй явдал байсан гэж мэдэгдсэн ч оюутнууд үл итгэн хэргийг үнэн мөнөөр нь мэдээлэхийг шаардан жагссан байна. Оюутнуудын үзэж буйгаар Дан овогт оюутан бусдын гарт амиа алдсан байж болзошгүй тул энэ хэргийн хариуцлагыг Пучен хотын эрх баригчид үүрэх ёстой гэж мэдэгджээ. Ийнхүү тавьсан шаардлагадаа хариулт нэхэн жагссан оюутнуудыг цагдаагийнхан хүчээр тараасан байна.
Хэрэг явдалын тухайд өнгөрсөн 02-ны орой Дан овогт оюутан дотуур байрандаа өөр нэгэн оюутантай муудалцсан гэнэ. Шалтгаан нь унтаж амрахад нь саад болсон гэжээ. Улмаар дотуур байрны багш нарыг дуудаж, сургуулийн удирдлага ч ирж, муудалцсан оюутнуудын асуудлыг шийдвэрлэсэн байна. Гэтэл удалгүй нэгэн оюутан бие засах өрөөнд ороход цонхны гулсдаг хавтан онгойрхой, дор нь модон сандал тавьсан бөгөөд Дан овогт оюутан доош унаж амиа алдсаныг сургуулийн удирдлагуудад мэдээлсэн гэнэ.