Монгол Улсын Хөгжлийн банкны Гүйцэтгэх захирал З.Нарантуяа нэгдүгээр сарын 13-ны өдөр БНСУ-ын актив удирдлагын KAMCO корпорацын ТУЗ-ийн дарга бөгөөд Гүйцэтгэх захирал Нам Жү Квон болон Гадаад харилцаа, бизнесийн  үйл ажиллагаа хариуцсан захирал Сан Жун Чой болон холбогдох албаны бусад хүмүүстэй уулзалт хийж, Хөгжлийн банкны чанаргүй активын удирдлагыг сайжруулах хамтын ажиллагааны талаар дэлгэрэнгүй ярилцлаа. 

БНСУ-ыг 1997, 2003, 2008, 2013 оны санхүүгийн хямралаа давахад голлох үүргийг гүйцэтгэсэн, актив удирдлагын салбарт 52 жилийн туршлагатай KAMCO корпорац нь санхүүгийн хямралд өртсөн байгууллагуудын чанаргүй зээлийн асуудлыг шийдвэрлэх, бизнесийн бүтцэд өөрчлөлт хийх зэргээр тухайн байгууллагыг хэвийн үйл ажиллагаагаа үргэлжлүүлэхэд нь дэмжлэг үзүүлж ажилладаг төрийн өмч давамгайлсан корпорац юм. Тухайлбал, тус корпорац олон улсын авто машин, электрон барааны салбарын тэргүүлэгч Daewoo группт 1990 оны эхэн үед бүтцийн өөрчлөлт хийж, дампуурлын ирмэгээс аварч байжээ.

2025 онд Хөгжлийн банк нь активын чанараа сайжруулах, олон улсын зах зээлээс хямд өртөг бүхий санхүүжилтийн эх үүсвэрийг татан төвлөрүүлэх, банкны үндсэн үйл ажиллагаагаа сэргээхээр томоохон зорилтууд дэвшүүлээд байгаа билээ. Энэ төлөвлөгөөний дагуу гадаад хамтын ажиллагааны хүрээнд БНСУ-д хийсэн анхны ажлын уулзалт амжилттай болж, KAMCO корпорацтай хамтран ажиллахаар боллоо.

Дашрамд дурдахад Хөгжлийн банкийг тойрсон зээл олголт, санхүүжилттэй  холбоотой үйл ажиллагаанд сүүлийн хоёр жилийн хугацаанд хуулийн байгууллагатай хамтран хэрэгжүүлсэн арга хэмжээний хүрээнд хууль бусаар авсан, олгосон зээлүүдэд холбогдох албан тушаалтуудад хуулийн хариуцлага хүлээлгэж буй. Гэсэн ч  гэмт хэргийн улмаас банканд учирсан хохирлоос өнөөдрийн байдлаар 130.0  тэрбум төгрөгийн хохирол л бодитойгоор барагдаж, банкны хүлээх бусад эрсдэл буюу алдагдал 1.6 их наяд төгрөг болж болзошгүй байгаа билээ.

Цаашид чанаргүй зээл, авлага болон хураагдсан хөрөнгүүдийн үнэ цэнийг бууруулахгүйгээр мэргэжлийн түвшинд эрсдэлийг зөв тооцоолж, актив тус бүрд тохирсон арга хэлбэрээр ажиллан эргэн төлөлтийг нэмэгдүүлэх, алдагдлыг багасгах шаардлагатай байгаа юм. Зээлээр санхүүжүүлсэн зарим төслийг бүтцийн өөрчлөлтийн хүрээнд сайжруулж, үргэлжлүүлэн хэрэгжүүлэх боломжийг хайхгүйгээр зөвхөн шүүхийн шийдвэр гүйцэтгэлийн журмаар барьцаа хөрөнгүүдийг нь дуудлага худалдаагаар худалдан борлуулахад нийт чанаргүй зээлийн 40 орчим хувийг л төлүүлж, зарим төслүүдийн үр дүнд бий болох ирээдүйн мөнгөн урсгал, орлого хаагдах, бий болох боломжгүй болох учраас мэргэжлийн гарц шийдлийг олохоор Хөгжлийн банкны одоогийн удирдлагууд ажиллаж байна.