“Бизнес-Инвест девелопмент ББСБ” ХХК-ийн нийтэд санал болгон гаргаж буй бондын анхдагч зах зээлийн арилжааны цан цохих арга хэмжээ боллоо.

Арга хэмжээнд Санхүүгийн зохицуулах хорооны дэд дарга Т.Цэрэнбадрал, “Монголын хөрөнгийн бирж” ХК-ийн бизнес, хөгжлийн газрын захирал Т.Хаш-Эрдэнэ, “Өлзий энд КО капитал ҮЦК” ХХК-ийн гүйцэтгэх захирал Б.Өлзийбаяр, “Бизнес-Инвест девелопмент ББСБ” ХХК-ийн ТУЗ-ийн дарга А.Алтансүх, гүйцэтгэх захирал Ц.Бат-Эрдэнэ болон холбогдох бусад хүмүүс оролцлоо. 

Санхүүгийн зохицуулах хорооны дэд дарга Т.Цэрэнбадрал нээж хэлсэн үгэндээ “Хөрөнгийн зах зээлийн 2025 оны анхны бүтээгдэхүүн өнөөдөр гарч байна. Санхүүгийн зохицуулах хороо зохицуулалтын орчныг олон улсын жишигт нийцүүлэн шинэчлэх, бүтээгдэхүүн, үйлчилгээнийхээ нэр төрлийг нэмэгдүүлэх хүрээнд цогц арга хэмжээг үе шаттай хэрэгжүүлснээр сүүлийн жилүүдэд хөрөнгийн зах зээл идэвхжиж, зах зээлийн үнэлгээ 13.02 их наяд төгрөгт, арилжааны дүн 1.58 их наяд төгрөгт хүрээд байна. Мөн ДНБ-д эзлэх хөрөнгийн зах зээлийн үнэлгээ 18.5 хувьд хүрч өссөн амжилтыг үзүүлээд байна. Энэ нь нэг талаар УИХ, Засгийн газраас хэрэгжүүлж буй бодлогын арга хэмжээний үр дүн, нөгөө талаас дэд бүтцийн байгууллагууд, хөрөнгө оруулагчдын идэвх оролцоо буюу төр, хувийн хэвшлийн хамтын ажиллагааны үр өгөөж юм.  Мөн өнгөрсөн оны хөрөнгийн зах зээлийн онцлох үйл явдлын нэг нь Үнэт цаасны зах зээлийн тухай хуульд нэмэлт, өөрчлөлт оруулсан явдал. Ингэснээр санхүүгийн зах зээлд шинэ төрлийн бүтээгдэхүүн, үйлчилгээг нэвтрүүлэх эрх зүйн орчин бүрдэж, дотоодын компаниуд бонд гаргах ажиллагаа хялбар, шуурхай болохын зэрэгцээ зохицуулагч болон арилжаа эрхлэх байгууллагын бүртгэлийн уялдаа холбоо сайжирч олон улсын жишигт нийцэх, үнэт цаасны арилжаа, клиринг, төлбөр тооцоо, төвлөрсөн болон тухайлсан бүртгэлтэй холбоотой зохицуулалт боловсронгуй болох зэрэг өгөөж арвин өөрчлөлт бий болсон. Тухайлбал, шинэ бүтээгдэхүүн буюу хадгаламжийн сертификат, хувьцааны хамтын санхүүжилтийн үйл ажиллагаа, үнэт цаас зээлэх, зээлдүүлэх үйлчилгээг нэвтрүүлэх эрх зүйн орчин бүрдэж холбогдох журмуудыг бид боловсруулаад, батлахад бэлэн болоод байна. Ингэснээр гарааны компани, жижиг, дунд үйлдвэрлэл, үйлчилгээ эрхлэгчдэд санхүүжилт татах боломж, хүртээмжийг нэмэгдүүлэх, хөрөнгийн зах зээлийн хөрвөх чадварыг нэмэгдүүлэх хүрээнд зохицуулалтын орчин боловсронгуй болно” гэдгийг онцолсон юм гэж Санхүүгийн зохицуулах хорооноос мэдээллээ.