Аль 2018 оноос худалдааны дайнд мордсон АНУ, БНХАУ учир зүйгээ ололцож чадалгүй, тэдний зөрчилдөөн улам хурцдаж, он гармагц Д.Трамп хятад бараанаас авах гаалийн татварын хэмжээг дахин 10%-иар нэмэв. Дахин нэмсэний учир нь, Д.Трамп Ерөнхийлөгчөөр ажилласан эхний ээлжиндээ 2018, 2019 онд тус, тус 10-25%-иар Хятадаас импортолсон барааны татварыг нэмж байсан юм.

Харин 2025 он гарсаар АНУ-ын татвар нэмсэн шийдвэрийн дараа Хятадын эрх баригчид ижил хариу арга хэмжээ авлаа. Худалдаа, гаалийн татварт чиглэсэн уг арга хэмжээнд:

БНХАУ-ын Төрийн зөвлөлийн Гаалийн татварын хорооноос зарласан дээрх хариу арга хэмжээ 2025 оны хоёрдугаар сарын 10-наас хэрэгжиж эхэлнэ. Энэ талаар Хятадын Сангийн яамны 2025 оны Гаалийн татварын тогтоол #1-д тодорхой заажээ. Гаалын татварын хорооноос АНУ татварын хувь хэмжээ нэмэх нэг талыг барьсан шийдвэр нь Дэлхийн худалдааны байгууллагын хууль, журмыг ноцтойгоор зөрчиж буйг давхар анхааруулаад заргалдахаа илэрхийлжээ.

БНХАУ-ын Арилжааны яамнаас вольфрам, теллур, бисмут, молибден, инди зэрэг чухал ашигт малтмалын экспортыг хязгаарлана. Экспортод бүрэн хориг тавихгүй ч дотоодын аюулгүй байдлын ашиг сонирхол бүхий 20 чухал ашигт малтмалыг экспортлохдоо зайлшгүй зөвшөөрөл авдаг байхаар шинэ журам баталсан нь АНУ-ын тал хэрэгцээгээ хангахад томоохон саад тулгарч эхэлнэ гэж эдийн засагчид дүгнэв. 

Хөдөө аж ахуй, уул уурхайгаас гадна бэлэн хувцас, биотехнологийн салбар ч Хятадын хатуу хазаараар хязгаарлагдах болж байна. Энэ чиглэлээр Хятадад үйл ажиллагаа явуулдаг Келвин Клайн, Томми Хилфигер брендийг эзэмшдэг PVH америк компанийг “Найдваргүй этгээдийн жагсаалт”-анд оруулж, энгийн зах зээлийн гүйлгээний зарчмыг зөрчсөн, Хятадын аж ахуйн нэгжүүдийн энгийн гүйлгээнд саад учруулж, хятад компаниудын эсрэг ялгаварлан гадуурхах арга хэмжээ өрнүүлсэн, хууль ёсны эрх болоод ашиг сонирхолд ноцтой хохирол учруулсан зэрэг үндэслэлээр хянан шалгаж, холбогдох хариуцлага тооцно гэлээ. Дээрх жагсаалтад орсон америк компаниудын үйл ажиллагааг хязгаарлах, хориглох, импорт, экспортын хөрөнгө оруулалтыг зогсоох зэрэг арга хэмжээ авахуулж болзошгүй.

Түүнчлэн, Хятадын Зах зээл зохиуцуулах төрийн хорооноос АНУ-ын технологийн аварга компани Гүүглд монополийн эсрэг шалгалт оруулна гэж зарлаад байна. Гэхдээ чухам ямар зарчмаар, юуг нь шалгах талаарх мэдээлэл тодорхойгүй.

АНУ Хятадаас хамгийн өндөр дүнгээр импортолдог 10 бүтээгдэхүүн/2023 оны дүн/:

Ямартай ч Дональд Трампын хувьд Бээжинтэй учраа ололцохын тулд БНХАУ-ын дарга Ши Жинпинтэй ярилцана гэж мэдэгдсэн нь тус хоёр орны худалдааны дайнаас улбаалж, олон улсын эдийн засаг, худалдааны урсгалд гарч болзошгүй өөрчлөлтөөс сэргийлэх найдвар бий болно. Хэрэв үгүй бол бараа бүтээгдэхүүний үнэ өсөх, сөргөлдөгч талууд гаалийн татвар нэмэгдсэн импортын бүтээгдэхүүний хангамжийг нөхөх, экспортын бүтээгдэхүүнээ шингээх өөр орон зай, зах зээл хайснаар дэлхий нийтийн тээврийн салбар ч хөдөлгөөнд орно гэж эдийн засагчид анхааруулж байгаа билээ.