ХБНГУ-ын Засгийн газар анчдын ангийн олзыг Африкаас Германд импортлохыг хориглох талаар ярьж эхэлсэн нь Ботсвана улсын Ерөнхийлөгч Мокгвээтси Масисигийн дургүйцлийг төрүүлэв.

Ноён М.Масиси дээрх яриа шийдвэр болон хэрэгжвэл 20,000 заан илгээж, Герман улсыг түйвээнэ гэж заналхийлжээ. “Энэ бол тоглоом биш шүү! Германчууд өөрсдөө тэр заантайгаа амьдрах хэрэгтэй!” гэж хилэгнэснийг Германы Бильд сонин уламжиллаа. Үүнийг Ботсвана улс Германд заанаар дайн зарлав гэж дэлхийн бусад хэвлэл мэдээллээр элэглэн бичиж байна.

Герман улс 2010-аад оноос Ботсвана улсад байгаль, ан амьтдыг хамгаалах хөтөлбөр хэрэгжүүлж, 2014 онд ан ав хийхийг хуулиар хориглосон. Гэтэл хөтөлбөр амжилттай хэрэгжиж, заан болон бусад амьтны тоо толгой огцом өсөж, бэлчээр талхлагдах, бэлчээрийн даац хэтрэх зэрэг сөрөг үр дагавар үүссэнээс гадна ан аваар ихээхэн хэмжээний орлого олох боломж нээгдэж, дээрх хоригийг 2019 онд цуцалж байжээ.

Сүүлийн жилүүдэд Африкийн орнууд барууны орнуудад дурамжхан хандах болсон юм. Учир нь, барууны орнуудаас байгаль, ан амьтан хамгаалах олон тооны хөтөлбөрийг хүчээр хэрэгжүүлдэг ч эцсийн үр дагаврыг нь тооцож үздэггүй. Ан амьтны тоо, толгой өссөнөөр ангийн спорт хөгжиж, ангийн гаралтай бүтээгдэхүүн олширсон ч барууны орнууд импортийн хориг тавьж боогдуулдаг байна.