Гаалийн ерөнхий газрын мэдээллээс харвал АНУ-д хийсэн экспорт 2024 онд 166.3 сая ам.доллар болжээ. Энэ нь өмнөх онтой харьцуулахад 4.5 дахин өссөн үзүүлэлт юм. Харин Монгол-АНУ-ын худалдааны нийт эргэлт 2024 онд 701.5 сая ам.долларт хүрчээ.

АНУ-ын Ерөнхийлөгч Дональд Трамп дэлхийн 185 улсад хариу тарифын бодлого баримтлахаа зарласны дотор Монгол Улс ч багтаад байна. Энэ нь манайд шууд нөлөөгөө үзүүлэхгүй ч БНХАУ-д үзүүлэх нөлөө нь манайд дам нөлөөлж, эдийн засгийн томоохон сорилт дагуулах эрсдэл учирлаа.

Монгол Улс АНУ-тай 2019 онд стратегийн түншлэлийн харилцаа тогтоосон. Үүгээр нь үзвэл АНУ-тай стратегийн түншлэлд хүрсэн 17 дахь улс нь Монгол Улс. Түүнчлэн цэвэр эрчим хүч, газрын ховор элементийн салбарт хамтран ажиллах боломжтой гэж тодорхойлсон. Монгол Улсын ноос ноолууран бүтээгдэхүүн зэрэг нэр бүхий бүтээгдэхүүнийг татвараас чөлөөлөх зорилготой “Гуравдагч хөршийн худалдааны тухай хууль”-г батлуулахаар хэлэлцэж байв.

Одоогоор Монгол Улсын нийт экспортын ердөө 1.1%-г АНУ эзэлж байгаа. Цаашид энэ тоог нэмэгдүүлэх боломжтой гэдгийг АНУ-аас Монгол Улсад суугаа элчин сайд болон, томоохон улстөрчид илэрхийлдэг. Импортын тухайд авч үзвэл Монгол Улсын нийт импортын 4.6 хувийг эзэлж байна. Үүнд автомашин, тээврийн хэрэгсэл, тэдгээрийн эд анги, химийн бодис, хүнсний бүтээгдэхүүн голчилсон аж.

Монгол дахь Америкийн худалдааны танхимын мэдээлж байгаачлан 2023 оны байдлаар АНУ Монгол Улсад 680 сая ам.долларын шууд хөрөнгө оруулалт хийжээ. Хөрөнгө оруулалтын салбарыг харвал нисэх онгоц, төмөр зам, уул уурхайн тоног төхөөрөмж, харилцаа холбооны салбарт голчлон хөрөнгө оруулсан байна.

Татварын бодлого АНУ-ын экспорт, импортын хувь хэмжээг бууруулж магадгүй байгаа юм. Хамгийн гол нь АНУ-БНХАУ-ын худалдааны дайн, түүнээс үүдэн Хятадын эдийн засгийн өсөлтөд нөлөөлөх сөрөг нөлөөлөл нь манайд хямрал үүсгэх хэмжээнд нөлөөлнө гэж шинжээчид анхааруулсаар байгаа билээ.