Үндэсний статистикийн хорооны мэдээллээр 2025 оны нэгдүгээр улиралд Монгол Улсын гадаад худалдаа 5.6 тэрбумын алдагдал хүлээлээ. Үүнийг өнгөрсөн оны мөн үетэй харьцуулахад 8.5% буурсан үзүүлэлт юм.

Мөн хугацаанд экспорт 3.1 тэрбум ам.доллар болж 17.5%, импорт 2.5 тэрбум ам.долларт хүрч 5.5% өсжээ. Гадаад орчноос шалтгаалсан геополитикийн ойлгомжгүй цаг үед экспорт буурч, импорт өсөх нь эрсдэлтэй гэж санхүүгийн голлох байгууллагууд анхааруулсаар байгаа. Учир нь дунд болон дундаас дээш орлоготой улс орнуудын эдийн засагт мөчлөгийн хямрал нүүрлэх өндөр магадлалтай. Тиймээс тэсэж үлдэхийн тулд сөрж тэмцэх ёстой аж. Төсвийн тэлэх бодлоготой, бүтээлч үйлдвэрлэлийн сураг байхгүй манайх шиг улсыг аль болох төсвийн сахилга батыг сахиулж, популист амлалтуудаа хумьж, эдийн засгийн бодлогодоо реформ хийх ёстойг сануулсаар буй.

Нэгдүгээр улиралд экспорт буурахад нүүрсний үнийн уналт голчлон нөлөөлжээ. БНХАУ-ын голлох боомтууд нүүрсний нөөцөө бүрдүүлсэн нь эрэлтийг сулруулж, улмаар үнэ буурах гол шалтгаан болоод байна. Нүүрсний үнэ цаашид ч унана. Түүнчлэн түүхий эдийн үнийн огцом хэлбэлзэл ч экспорт буурахад нөлөөлсөн шалтгааны нэг. Манай голлох экспортын бүтээгдэхүүний нэг зэсийн ханш он гарснаас хойш тогтмол өссөн. Гэвч Трампын эргэж буцсан шийдвэрээс шалтгаалан огцом унах эрсдэл ч бас бий. Ханш нь уналаа, уналаа гээд өнгөрсөн жилийнхээс өндөр түвшинд хадгалагдаж байгаа нь гялтайх ганц мэдээ юм даа.

Азийн хөгжлийн банк энэ долоо хоногийн эхээр Монгол Улсын эдийн засгийн өсөлтийн төлөвийг 6.6% байна гэж дүгнэсэн. Гэсэн ч түүхий эдийн экспорт, ялангуяа нүүрснээс хамааралтай эрсдэл өндөр байгааг анхааруулсан билээ. АНУ-аас ногдуулсан гаалийн татвар жин дарахгүй ч БНХАУ-д үзүүлэх эдийн засгийн сөрөг нөлөө манайд сүүдрээ тусгаж эхэллээ. Үүнийг статистикийн дүн мэдээ бэлхнээ харуулна.