Он гарснаас хойш 20 гаруй хувиар өсөөд байгаа алтны ханш даваа гарагийн арилжаагаар дахин шинэ дээд амжилт тогтоолоо. Алтны спот ханш 3436.01 ам.долларыг давж түүхэн дээд амжилт тогтоосон бол алтны фьючерс ханш унци нь 3425.30 ам.долларт хүрч өссөн байна. Даваа гарагийн оройн арилжаагаар зургаадугаар сард нийлүүлэх алтны ханш нэг унци нь3450.90 ам.долларт хүрч мөн л дээд амжилт тогтоожээ.

Ийнхүү өсөх болсон шалтгаан нь АНУ-Хятадын худалдааны дайн, тэр дундаа АНУ-ын засаг захиргааны эргэж буцсан шийдвэр, мөн ОХУ Улаан өндөгний баяраар 30 цаг гал зогсооно гэсэн ч бодит байдал хэрэгжихгүй байгаатай холбоотой аж.

Сүүлийн нэг жилийн дотор алтаар баталгаажсан хөрөнгийн хэмжээ өссөн нь алтны ханшид нөлөөлсөн хүчин зүйлсийн нэг. Томоохон Төв банкнууд ч алтны нөөцөө нэмж байгаа нь алтны эрэлтийг нэмж орхисон. “Голдман Сакс” тэргүүтэй дэлхийн санхүүгийн томоохон байгууллагууд ирэх оны эхэн гэхэд алтны ханш 4000 ам.доллар магадгүй гэж таамаглаж байна.