АНУ-ын засаг захиргааны тарифын бодлого, эргэж буцсан шийдвэр, алтны ханшны өсөлтөөс шалтгаалан Олон улсын валютын сан /ОУВС/ дэлхийн эдийн засгийн өсөлтийн төлөвийг бууруулах шийдвэр гаргажээ. ОУВС өнгөрсөн нэгдүгээр сард дэлхийн эдийн засгийн 3.3% өснө гэж таамаглаж байсан бол шинэ таамаглалаар 0.5 нэгж хувиар бууруулж 2.8%-д хүргээд байна.

Нэг сар хүрэхгүй хугацаанд АНУ-ын засаг захиргаа дэлхийн 180 гаруй улсад тариф тогтоож, улмаар энэ шийдвэрээ 90 хоног хойшлуулж, АНУ-ын боловсролын салбарын хөрөнгө оруулалтыг танаж, Холбооны нөөцийн банкны захирлыг халах тухай сүрдүүлсэн нь эдийн засагт тодорхойгүй нөхцөл байдал үүсээд байна. Түүнчлэн АНУ-ын долларын ханш гурван жилийн доод түвшинд хүрч, эдийн засаг нь сүүлийн таван жилд байгаагүйгээр буурахыг шинжээчид хэлсээр байгаа билээ.

Цаашид АНУ-ын баримталж буй бодлогоос шалтгаалан эдийн засагт нийлүүлэлтийн сөрөг шок үүсгэхийг ОУВС тайландаа дурдаад байна. Түүнчлэн өндөр хөгжилтэй АНУ, Их Британи, Канад зэрэг улс орнуудын инфляц 0.4 пунктээр өснө гэж дүгнээд энэ нь дундаас дээш орлоготой улс орнуудад богино хугацааны хямрал үүсэн шалтгаан болохыг анхааруулжээ.