АНУ болон Хятадын тал худалдааны дайны галыг бага ч болов намжаах тохироонд хүрсний дараа түүхий эдийн зах зээл дээр алтны ханш саарч эхэллээ. Тухайлбал алтны спот ханш 2.7 хувь буурч, унц тутамдаа 3235.75 ам.долларт хүрсэн бол АНУ-ын алтны фьючерс ханш өчигдрийн үдээс хойшхи арилжаагаар 102 ам.доллароор буурч 3241.80 ам.долларт хүрсэн байна. Энэ нь сар гаруйн хугацааны хамгийн доод үзүүлэлт юм.

Өнгөрсөн долоо хоногийн сүүлээр АНУ, Хятадын худалдааны төлөөлөгч нар Швейцарийн Женев хотноо уулзаж АНУ-ын зүгээс Хятадад тавьсан 145 хувь хүртэлх тарифыг 30 хувь хүртэл бууруулж, хариуд нь Хятадаас АНУ-д тавьсан 125 хувийн тарифыг 10 хувь болтол бууруулахаар тохиролцсон юм. Үүнээс шалтгаалан Ази, номхон далай хувьцаануудын ханш ч буурсан юм. Чухам үүнтэй холбоотойгоор хөрөнгө оруулагчид алтны салбарын эрсдэлийг бууруулж дүгнэсэн. Учир нь хоёр том эдийн засгийн худалдааны толхилцоон эдийн засагт нөлөөллөө тусгана гэх болгоомжлол байсан тул энэ он гарснаас хойш алтны ханш 20 хүртэл хувиар өссөн юм. Өнгөрсөн сард л гэхэд алтны ханш унц тутамдаа 3500 ам.доллароос давж, түүхэн дээд амжилтаа тогтоосон билээ.

Дэлхийн санхүүгийн томоохон байгууллагын нэг “JPMorgan” ирэх оны хоёрдугаар улиралд алтны ханш 4000 ам.доллароос давах бөгөөд эдийн засгийн дунд хугацааны мөчлөгийн улмаас 2029 онд бүр 6000 ам.долларт хүрч магадгүй гэж таамаглаад байна.