Санхүүгийн зохицуулах хорооны ээлжит хуралдаан өнөөдөр боллоо. Хуралдаанаар банк бус санхүүгийн зээлийн үйл ажиллагааны журамд нэмэлт өөрчлөлт оруулах замаар салбарын онцлогт нийцүүлэн “Банк бус санхүүгийн байгууллагаас олгох хэрэглээний зээлд өр, орлогын харьцаа тооцох аргачлал”-ийг баталлаа. Энэхүү аргачлал нь иргэдийн орлогыг тодорхойлохдоо цалин хөдөлмөрийн хөлсний орлогод гэрээ хэлцэл болон баримтаар нотлогдох гарт олгосон тогтмол мөнгөн орлого мөн үйл ажиллагааны орлогод хөрөнгө ашиглуулсан эсвэл түрээсэлсний орлого, бичил худалдаа, ажил үйлчилгээний орлогыг хамааруулж тооцохоор тус тус зохицуулалт орууллаа. Түүнчлэн хэрэглээний зээлийн төрөлд хүн амын амьжиргааны түвшнээс доош дүнтэй болон сургалтын бүх төрлийн зээл хамаарахгүй цаашилбал жирэмсний болон хүүхэд асрах чөлөөтэй байгаа иргэдийн хувьд чөлөө авахаас өмнөх 6 сарын орлогыг тооцох зэрэг зохицуулалтыг тусгаснаар иргэдэд санхүүгийн үйлчилгээ авах таатай нөхцөлийг бүрдүүлж өглөө. Ингэснээр өр орлогын харьцааг илүү оновчтой тооцоолон зээлийг зохистой хэмжээнд олгох, иргэдийг өрийн дарамтад орох эрсдэлийг бууруулах давуу талтай юм.

ЗАРИМ АЖ АХУЙН НЭГЖИЙН ТУСГАЙ ЗӨВШӨӨРӨЛ, БҮРТГЭЛ, ЭРХ ОЛГОХ АСУУДЛЫГ ХЭЛЭЛЦЭН ШИЙДВЭРЛЭВ

Хөрөнгөөр баталгаажсан үнэт цаас гаргах үйл ажиллагаа эрхлэх тусгай зөвшөөрлийг хоёр компанид, нэг компанийн хувь нийлүүлсэн хөрөнгийн хэмжээ, хувьцаа эзэмшигчийн бүтэц, бүрэлдэхүүнд өөрчлөлт оруулахыг зөвшөөрч, нэг компанийг үнэт цаасны зах зээлд оролцогчид аудитын үйлчилгээ үзүүлэх хуулийн этгээдээр бүртгэхээр тус тус шийдвэрлэлээ. Хуралдаанаар мөн даавгалын байгууллагад аудит хийх эрхийг нэг компанид, банк бус санхүүгийн салбарт факторингийн үйлчилгээ эрхлэх тусгай зөвшөөрөл болон төлбөр тооцооны хэрэгсэл гаргах энгийн зөвшөөрлийг нэг компанид, факторингийн үйлчилгээ эрхлэх тусгай зөвшөөрөл болон богино хугацаат санхүүгийн хэрэгсэлд хөрөнгө оруулалт хийх энгийн зөвшөөрлийг нэг компанид, богино хугацаат санхүүгийн хэрэгсэлд хөрөнгө оруулалт хийх энгийн зөвшөөрөл болон гадаад валютын арилжаа эрхлэх тусгай зөвшөөрлийг хоёр компанид нэмж олгохоор, үл хөдлөх эд хөрөнгө зуучлалын байгууллагын үйл ажиллагаа эрхлэх тусгай зөвшөөрөл болон үнэт металл, үнэт чулууны эсхүл тэдгээрээр хийсэн эдлэлийн арилжаа эрхлэгчийн үйл ажиллагаа эрхлэх тусгай зөвшөөрлийг мөн хоёр компанид тус тус олгохоор хэлэлцэн шийдвэрлэлээ.