“Эрдэнэт үйлдвэр”-ийн захирал Х.Бадамсүрэн Төрийн хэмнэлтийн хуулийг хэрэгжүүлэх нэрийдлээр дөрвөн орлогчийнхоо хоёрынх нь албан тушаал, дуудагдах сэтрийг нь өөрчилсөн байна. Засгийн газраас санаачилж, УИХ баталсан Төрийн хэмнэлтийн хуулиар төрийн өмчит компаниудыг орлогч даргатай ажиллахыг хориглосон. Мөн төрийн өмчит комапниудын одоо байгаа дэд, тэргүүн дэд захирал зөвлөхүүдийг чөлөөлөхдөө албан тушаалын нэрийг өөрчлилж, орон тоо хадгалаыг хатуу хориглосон юм. Тодруулбал, Төрийн хэмнэлтийн хуулийн 5.4-т “Энэ хуульд заасныг зөрчиж тэргүүн дэд, дэд, орлогч дарга, зөвлөхийн чиг үүрэгтэй ижил эрх, үүрэг бүхий өөр нэршилтэй албан тушаалын орон тоо бий болгох, түүнд аливаа албан тушаалтныг томилох, орон тоог хэвээр хадгалахыг хориглоно” гэж заасан байгаа. Тэгвэл “Эрдэнэт үйлдвэр”-ийн захирал Х.Бадамсүрэн энэ хуулийн хүрээнд дөрвөн орлогчынхоо хоёрыг чөлөөлөх шийдвэр гаргахдаа дээрх хуулийн заалтуудыг илтэд гуйвуулж, зөрчсөн байна. “Эрдэнэт үйлдвэр”-ийн өнгөрсөн долоо хоногийн шуурхай хуралдаанаар ерөнхий захирлын нэгдүгээр орлогч бөгөөд ерөнхий инженер Т.Батмөнхийг нэгдүгээр орлогч сэтрийг авсан бол ерөнхий захирлын санхүү, эдийн засаг хариуцсан орлогч Д.Үүрийнтуяаг Тамгын даргын албанд шилжүүлэн томилжээ. Мөн тус үйдлвэрийн ерөнхий захирлын хамтын ажиллагаа, нийгмийн асуудал хариуцсан орлогч, “Эрдэнэт медипас” эмнэлгийн захирлаар давхар ажилладаг Ц.Бат-Энх, ерөнхий захирлын хөгжлийн асуудал хариуцсан орлогч П.Энхбат нарыг өөр албан тушаалд сэлгэн томилох асуудал яригдаж байгаа юм байна. Ер нь энэ он гарсаар “Эрдэнэт үйлдвэр”-ийн ерөнхий захирал Х.Бадамсүрэн болон түүний дөрвөн орлогч захиралд хариуцлага тооцох асуудал эрчимтэй яригдаж эхэлсэн. Тухайлбал, Үндэсний аудитын газраас “Эрдэнэт үйлдвэр”-ийн 2021 оны санхүүгийн үйл ажиллагаанд хяналт хийхэд 230 тэрбум төгрөгийн зөрчил илэрсэн юм.