“Монголын хөрөнгийн бирж” ХК-ийн “MSE hall”-д өнөөдөр (2025-06-25) "Омни ассет II ТЗК” ХХК -иас олон нийтэд санал болгон гаргаж буй "Омни ассет II” хөрөнгөөр баталгаажсан үнэт цаасны анхдагч зах зээлийн арилжааг нээх цан цохих ёслол боллоо.

Ёслолын ажиллагаанд “Монголын хөрөнгийн бирж” ХК-ийн Гүйцэтгэх захирлын үүргийг түр орлон гүйцэтгэгч Б.Дөлгөөн, Санхүүгийн зохицуулах хорооны Дэд дарга Т.Цэрэнбадрал, “Омни Капитал ББСБ” ХХК-ийн ТУЗ-ийн дарга Э.Пүрэвсүрэн, “Апекс Капитал ҮЦК” ХХК-ийн Гүйцэтгэх захирал Б.Лхамдолгор болон албаны бусад хүмүүс оролцов.

“Монголын хөрөнгийн бирж” ХК-ийн Гүйцэтгэх захирлын үүргийг түр орлон гүйцэтгэгч Б.Дөлгөөн ёслолын ажиллагааг нээж хэлсэн үгэндээ:

"Хүрэлцэн ирсэн та бүхэнд энэ өдрийн мэнд хүргэе! “Омни капитал нь ББСБ” ХХК 2019 оноос эхлэн Монголын хөрөнгийн зах зээлд идэвхтэй үйл ажиллагаа явуулж нээлттэй болон хаалттай хүрээнд санхүүгийн үйлчилгээг олон нийтэд үзүүлж ирсэн компани.

Тус компани “Монголын хөрөнгийн бирж”-ээр дамжуулж хөрөнгийн зах зээлд үнэт цаас гарган 2022 онд 5 тэрбум, 2023 онд 6 тэрбум төгрөгийг олон нийтээс амжилттай татан төвлөрүүлж, хөрөнгө оруулагчдадаа хүүгийн төлөлтийг хугацаандаа олгож ирсэн сайн түүхтэй байгууллага байна. “Омни Ассет II ТЗК” ХХК нь өмнөх амжилтууддаа үндэслэн Монголын  хөрөнгийн бирж дээр өнөөдөр жилийн 19.2 хувийн хүүтэй, 24 сарын хугацаатай, нэг бүр нь 100,000 төгрөгийн үнэ бүхий 140,000 ширхэг хөрөнгөөр баталгаажсан үнэт цаасыг олон нийтэд санал болгож, нийт 14 тэрбум төгрөгийг татан төвлөрүүлэхээр төлөвлөсөн байна.

Анхдагч зах зээлийн арилжааны захиалгыг өнөөдрөөс (2025.06.25) эхлэн ажлын 5 хоног Монголын хөрөнгийн биржийн IPO системээр дамжуулж хүлээн авахаар боллоо. 

Эрхэм хөрөнгө оруулагч та бүхнийг арилжаанд нээлттэй оролцохыг урьж байна. “Омни Ассет II ТЗК” ХХК-ийн хамт олонд баяр хүргэж, арилжааны үйл ажиллагаанд нь амжилт хүсье” гэв.

Санхүүгийн зохицуулах хорооны Дэд дарга Т.Цэрэнбадрал:

Санхүүгийн зохицуулах хороо Монголын хөрөнгийн бирж, Үнэт цаасны оролцогч байгууллагуудтай хамтран үнэт цаасны зах зээлийг хөгжүүлэх, тэр дундаа тогтмол өгөөжтэй санхүүгийн хэрэгсэл буюу бонд, хөрөнгөөр баталгаажсан үнэт цаас (ХБҮЦ)-ыг зах зээлд гаргах талаар бодлогын арга хэмжээг авч ажилласан. Үүний үр дүнд өмнө нь хөрөнгийн бирж дээр зөвхөн хувьцаа, бонд гэсэн хоёр бүтээгдэхүүн арилжигддаг байсан бол одоо хөрөнгөөр баталгаажсан үнэт цаас, бонд, бонд дотроо ногоон бонд, рейтингтэй бонд зэрэг ангиллууд нэмэгдсэн. Мөн өрийн хэрэгслийн журамдаа өөрчлөлт оруулснаар сошиал бонд, тогтвортой хөгжлийн бонд гэх зэрэг олон улсын жишгийн дагуу бүтээгдэхүүнүүд гарах боломж бүрдсэн.

Өнгөрсөн 4 жилийн хугацаанд МХБ дээр 16 ХБҮЦ гарсан. Ингэснээр дотоодын аж ахуйн нэгжүүд нийт 273 тэрбум төгрөгийн үнийн дүн бүхий санхүүжилт босгосон байна. ХБҮЦ-ны онцлог нь эрсдэл багатай, мөнгөн урсгалаар баталгааждаг, өндөр өгөөжтэй санхүүгийн хэрэгсэл учраас өнөөдөр хөрөнгө оруулагчдын сонирхлыг татахуйц санхүүгийн бүтээгдэхүүн зах зээлд гарч байна гэж үзэж байна. Зах зээлд шинэ бүтээгдэхүүн гаргаж байгаа та бүхэнд баяр хүргэж, анхдагч зах зээлийн арилжаанд нь амжилт хүсье” гэв.

“Апекс капитал ҮЦК” ХХК-ийн Гүйцэтгэх захирал Б.Лхамдолгор:

“Хөрөнгийн зах зээлд шинэ бүтээгдэхүүн гаргахад олон талд хамтын ажиллагаа өрнөдөг. "ОМНИ АССЕТ II" ХБҮЦ-ыг хөрөнгө оруулагчдад, зах зээлд санал болгох үйл ажиллагаанд хамтран ажилласан хууль, аудитын компани болон мэргэжлийн оролцогч байгууллагууддаа талархал илэрхийлье. Түүнчлэн энэ бүтээгдэхүүн хөрөнгө оруулагчдын сонгож болох өндөр өгөөжтэй бүтээгдэхүүн бөгөөд эрсдэлийн үнэлгээг нарийн тооцож, хөрөнгө оруулагчдад ямар ашигтай талаарх зөвлөгөө мэдээллийг бид олон нийтэд итгэл төгс танилцуулсан. Жилийн 19.2 хувийн өгөөжтэй "ОМНИ АССЕТ II" ХБҮЦ-ны хүүгийн төлбөрийг улирал тутам төлөх болно” хэмээн тодотголоо.

Үйл ажиллагааны төгсгөлд “Омни Капитал ББСБ” ХХК-ийн ТУЗ-ын дарга Э.Пүрэвсүрэн анхдагч зах зээлийн арилжааг нээх цан цохих ёслол үйлдсэн юм.