Галактикийн хамгаалагчид, Зорчигчид зэрэг киногоор олонд танигдсан жүжигчин Крис Пратт, түүний эхнэр Катерин Шварцнеггер нар Лос Анжелест 1393мкв талбайтай тансаг зэрэглэлийн хувийн орон сууц барихын тулд түүхэн байшинг нураасан нь нийтийн эгдүүцлийг төрүүлээд байна.

Тэд өнгөрсөн жил 12.5 сая доллараар Зиммерманы хэмээн алдаршсан Брентвүүдийн байшинг худалдан авч байжээ. Уг байшин болон цэцэрлэгийн загварыг алдарт архитектор Крейг Эллвүүд, Гарретт Экбо нарын ХХ зууны дунд үеийн орчин цагийн уран барилгын сонгодог төлөөлөл болсон эрхмүүд 1953 онд дизайныг нь боловсруулан барьсан түүхтэй. Зиммерманы байшингийн өмнөх эзэн нь “The Man From Uncle” цувралыг санаачилсан Сем Рольфи бөгөөд 205,000 доллараар худалдаж авч байсан гэнэ. Түүний бэлэвсэн эхнэр Хильда нөхрөө 1993 онд нас барснаас хойш 30 жил тэр байшиндаа амьдарсан юм байна.

Крейг Эллвүүд, Гарретт Экбо нарын дизайныг нь боловсруулан барьсан энэхүү байшин орчин үеийн уран барилгын түүхэн дэх сод бүтээл байсан учраас алдартай бөгөөд ийнхүү юу ч үгүй газрын хөрснөөс арчигдсанд урлаг, соёлд элэгтэй хүмүүс ихэд харамсаж буй юм.