Засгийн газраас нүүрсний хулгайтай тэмцэж буйгаа зарлаж, “Эрдэнэс Тавантолгой” компанийн захирал асан Б.Ганхуягийг гэр бүлээр нь барьж хорьсноор, эхний ээлжид 17 хүний нэр ил болов. Тэдний дотор Б.Ганхуягт шууд заавар өгдөг байсан гэх Ерөнхийлөгч асан Х.Баттулга явж байгаа. Мөн Ерөнхийлөгчийн Тамгын газрын дарга асан З.Энхболд, Ө.Шижир нар, Үндэсний Аюулгүй байдлын зөвлөлийн нарийн бичгийн дарга асан А.Гансүх, УИХ-ын 9 гишүүн, Өмнөговь аймгийн МАН-ын хорооны дарга Х.Мандахбаяр зэрэг эрх баригч намынхан байна. Эх сурвалжуудын мэдээлж буйгаар Б.Ганхуягийг гэр бүлээр нь хорьж байгаад, ам ангайлгасан нь дээрх нэрс бололтой. Цаашид хэдэн хүний нэрс ил болж, хэн хэн нүүрсний хулгайд хутгалдсан болохыг илчлэх хүн зөвхөн Б.Ганхуяг. Тиймээс УИХ, Засгийн газар, эрх баригч намынхан сандралдаж эхэлсэн. Сандарсан учраас элдэв бурхан шүтээний нэр барьж, өөрсдийгөө өмгөөлж эхэллээ. Гэхдээ энэ бол зөвхөн эхлэл бөгөөд цаана нь УИХ-ын 20 гаруй гишүүн, Засгийн газрын 5-6 сайд байгаа гэх мэдээлэл бий.  Засгийн газрын хувьд нэгэнт эхлүүлсэн улс төрийн акц зогсох ёсгүй. Шударга ёсны талаасаа ч олон нийт шаардсаар байгаа. Иймээс МАН-ын шинэчлэлийн хөдөлгөөн, Монголын оюутны холбооноос гаралтай Б.Ганхуяг, Н.Удаанжаргал нарын холбоо сүлбээ бүрийг шалгах нь тодорхой. Улмаар ээлжит дуулиант баривчилгаанууд өрнөж, нүүрсний шуугианыг өрдөнө. Харин Б.Ганхуяг тэргүүтэй намын даалгавар авч ажилд очсон залуус хуулийн хүрээнд ажиллаж ирсэн гэдгээ мэдэгдсээр байх нь ойлгомжтой. Ингэхдээ хилс хэрэгт хутгалдсан гэдгээ хэлээд зогсохгүй дээрээс даалгавар өгч байсан ах нартайгаа нэг завинд сууж өнөөдрийг хүрсэн гэдгээ анхааруулах болжээ. Тухайлбал, Б.Ганхуяг нэрс ил болоогүй байгаа албан тушаалтнуудад “Би ганцаараа унахгүй шүү” хэмээн үг дайсан талаар эх сурвалжууд хэлж байгаа.