Олон нийтийн жагсаал, цуглаан гэхээр улс төрийн буруу үйлдэл эсвэл улстөрчдийн эсрэг чиг баримжаатай байдаг билээ. Гэтэл Испанийн иргэд өнгөрсөн амралтын өдрүүдэд Мадрид хотын гудамжинд хэдэн мянгаараа цуглан тус улсын Ерөнхий сайд Педро Санчезийг битгий огцрооч гэж ятгахаар жагссан байна. Испанийн Социалист намын дарга П.Санчез нь ирээдүйд ирэх хариуцлагаа үүрэхийн тулд бүхий л албан ёсны үүрэг ажлаас огцрох гэж буйгаа өнгөрсөн долоо хоногийн лхагва гарагт зарласан. Эл мэдэгдэл нь тус улсын олон сая иргэний сэтгэлийг өвтгөж, цочиролд оруулсан бололтой. Дээрх мэдэгдлийг гаргахын өмнө Испанийн дээд шүүхээс Ерөнхий сайдын эхнэрийн холбогдсон авлигын хэргийг мөрдөн шалгах үүргийг холбогдох байгууллагад нь өгсөн юм.

Социалист намын дэмжигчид Мадрид хотын төвийн нийтийн тээврийн хэрэгслээр явж, “Ноён Санчез, та битгий бууж өгөөрэй!”, “Та ганцаараа биш шүү!” гэх зэргээр хашхиралдан дэмжиж буйгаа илэрхийлсэн нь содон үйл явдал байлаа гэж Ройтерс агентлаг бичжээ. Ерөнхий сайд Педро Санчезийн хувьд өнгөрсөн амралтын өдрүүдэд ямар нэгэн тайлбар хийгээгүй бөгөөд өнөөдөр буюу 2024-04-29-ний даваа гарагт нийт иргэд болон дэмжигчдэдээ хандан үг хэлнэ гэж түүний ажлын албанаас мэдээлэв.