Газрын тос боловсруулах үйлдвэр (ГТБҮ)-ийн технологийн тоног төхөөрөмжүүдийн дийлэнх нь Энэтхэг улсын 20 шахам компанид үйлдвэрлэгдэж байна.
Тоног төхөөрөмжийн үйлдвэрлэл эхнээсээ дуусч, үйлдвэрийн талбай руу ачигдах гэж байгаатай холбоотойгоор “Монгол газрын тос боловсруулах үйлдвэр” ТӨХХК-ийн Гүйцэтгэх захирал Д.Алтанцэцэг, албадын дарга, инженерүүдийн хамтаар нэрлэгийн цамхагууд, олон тооны даралтат сав, цахилгаан станцын бойлер, ус цэвэршүүлэх байгууламжийн тоног төхөөрөмж, тэдгээрийн эд ангиудын үйлдвэрлэлийн явцыг шалгах, сорил тест, тээвэрлэлтийн бэлтгэл ажлыг хангах зорилгоор Энэтхэг улсын Хайдерабад, Ченнай, Мумбай, Пуне хотуудад томилолтоор ажиллаж байна.
“Megha Engineering and Infrastructures Limited” компанийн Хайдерабад хот дахь 4 үйлдвэрт ГТБҮ-ийн EPC 02 багц ажилд хамаарах 28 даралтат савыг үйлдвэрлэж ачилтад бэлэн болгоод байна.
ГТБҮ-ийн үндсэн технологийн байгууламжууд болох 58,4 метр өндөр, 245 тн жинтэй, 3,2 м диметртэй Атмосферийн нэрлэгийн цамхаг, 49,7 метр өндөр, 230 тн жинтэй, 4,8 м диаметртэй Вакуум нэрлэгийн цамхагийг БНЭУ-ын Ченнай хот дахь The KCP Limited компани үйлдвэрлэж байна. 
Тус цамхагуудын хийцүүдийн илчийн боловсруулалт, үл эвдэх сорилууд, азотын дүүргэлтээр пневматик – хийн болон үл нэвчүүлэх гидравлик тест, зайн хэмжээсийн тохиргоо гэх мэт 17 үе шат бүхий чанарын шалгалт, сорил тест шат дараалалтай хийгдэж буй бөгөөд эцэст нь зэврэлтээс хамгаалах ажилбарыг гүйцэтгэж, цамхагийг 4 хэсэгт хуваан усан онгоцоор Ченнай-Тяньжин боомтоор тээвэрлэн Монголд авчрах юм.
Төсөл хэрэгжүүлэгч “Монгол газрын тос боловсруулах үйлдвэр” ТӨХХК, Төслийн менежментийн зөвлөх Engineers India Limited, Ерөнхий гүйцэтгэгч Megha Engineering and Infrastructures Ltd болон тоног төхөөрөмжийн үйлдвэрлэгч компаниудтай хамтран техникийн хурал уулзалтууд хийж, ажлын явцыг хэлэлцэж, график төлөвлөгөөг нарийвчлан,  ачилт, тээвэрлэлтийн хугацааг шинэчлэн тохиролцов. 
ГТБҮ-ийн талбайд дээрх байгууламжуудыг 2026 оны эхэнд Монгол дахь үйлдвэрийн талбайд буулгаж, угсралтын ажлыг эхлүүлэхээр болж байна.