Улсын Их Хурлын Эдийн засгийн байнгын хороо өнөөдрийн (2025.12.09) хуралдаанаараа “Хянан шалгах түр хороо байгуулах тухай” Улсын Их Хурлын тогтоолын төсөл болон “Засгийн газарт чиглэл өгөх тухай” Байнгын хорооны тогтоолын төслийг хэлэлцэн шийдвэрлэсэн.

Үргэлжлүүлэн "Монгол Улсыг 2026-2030 онд хөгжүүлэх таван жилийн үндсэн чиглэл баталсантай холбогдуулан авах арга хэмжээний тухай" Улсын Их Хурлын тогтоолын төслийг хэлэлцлээ. Улсын Их Хурлын 2025 оны 11 дүгээр сарын 28-ны өдрийн нэгдсэн хуралдаанаар “Монгол Улсыг 2026-2030 онд хөгжүүлэх таван жилийн үндсэн чиглэл батлах тухай” Улсын Их Хурлын тогтоолын төслийн эцсийн хэлэлцүүлгийг явуулах үеэр нэгдсэн хуралдаанд оролцсон гишүүдийн олонхын саналаар "Монгол Улсыг 2026-2030 онд хөгжүүлэх таван жилийн үндсэн чиглэл баталсантай холбогдуулан авах арга хэмжээний тухай" Улсын Их Хурлын тогтоолын төслийг Эдийн засгийн байнгын хорооны хуралдаанаар хэлэлцүүлж,  нэгдсэн хуралдаанаар батлах нь зүйтэй гэсэн санал дэмжигдсэн болохыг Р.Сэддорж дарга танилцуулав.





Хэлэлцэж буй асуудалтай холбогдуулан Улсын Их Хурлын гишүүн Ж.Ганбаатар, Г.Очирбат, Р.Сэддорж нар асуулт асууж, Улсын Их Хурлын гишүүн, “Монгол Улсыг 2026-2030 онд хөгжүүлэх таван жилийн үндсэн чиглэл батлах тухай” Улсын Их Хурлын тогтоолын төслийг хэлэлцүүлэгт бэлтгэх үүрэг бүхий ажлын хэсгийн ахлагчаар ажилласан Г.Тэмүүлэнгээс хариулт, тайлбар авсан юм. Төсөлтэй холбогдуулан үг хэлэх шаардлагагүй хэмээн гишүүд үзсэн тул санал хураалт явууллаа. Байнгын хорооны хуралдаанд оролцсон гишүүдийн 61.1 хувь нь "Монгол Улсыг 2026-2030 онд хөгжүүлэх таван жилийн үндсэн чиглэл баталсантай холбогдуулан авах арга хэмжээний тухай" Улсын Их Хурлын тогтоолын төслийг нэгдсэн хуралдаанд оруулж хэлэлцүүлэхийг дэмжив. Иймд энэ талаар санал, дүгнэлтээ нэгдсэн хуралдаанд танилцуулахаар шийдвэрлэлээ.


Дараа нь Стратегийн ач холбогдол бүхий бүтээгдэхүүний хангамж, нийлүүлэлтийг дэмжих тухай хуулийн төслийн эцсийн хэлэлцүүлгийг хийв. Хуулийн төслийн талаарх хууль зүйн зөвлөмжийг холбогдох Байнгын хороо хэлэлцсэн болохыг Р.Сэддорж дарга хэлээд Хууль зүйн байнгын хорооны санал, дүгнэлтийг танилцууллаа. Төсөл нь батлагдсан тохиолдолд тодорхой хугацаанд үйлчлэхээр байх тул төслийн 11 дүгээр зүйлийн 11.1 дэх хэсэгт хууль хүчин төгөлдөр болох хугацааг нэмж тусгах, хуулийн төслийн эцсийн хэлэлцүүлгийг Монгол Улсын Их Хурлын чуулганы хуралдааны дэгийн тухай хуулийн 42 дугаар зүйлийн 42.2.2-т заасны дагуу явуулах талаарх зөвлөмжийг Хууль зүйн байнгын хороо дэмжсэн байна.







Эцсийн хэлэлцүүлэгт бэлтгэсэн төсөл болон Хууль зүйн байнгын хорооны дээрх санал, дүгнэлттэй холбогдуулан Улсын Их Хурлын гишүүн Ж.Ганбаатар, П.Батчимэг, Г.Очирбат, С.Цэнгүүн, Р.Сэддорж нар асуулт асууж, Аж үйлдвэр, эрдэс баялгийн сайд болон ажлын хэсгийн гишүүдээс хариулт, мэдээлэл авсан юм. Монгол Улсын Их Хурлын чуулганы хуралдааны дэгийн тухай хуулийн 42 дугаар зүйлийн 42.2.2 дахь хэсгийг баримтлан санал хураалт явуулан шийдвэрлэлээ. Хуулийн баталсан өдрөөс эхлэн 2030 оны 12 дугаар сарын 31-ний өдрийг дуустал хугацаанд дагаж мөрдөх агуулга бүхий зарчмын зөрүүтэй саналын томьёоллыг гишүүдийн 57.9 хувь нь дэмжсэн.


Ийнхүү Стратегийн ач холбогдол бүхий бүтээгдэхүүний хангамж, нийлүүлэлтийг дэмжих тухай хуулийн төслийн эцсийн хэлэлцүүлгийг хийсэн талаарх Байнгын хорооны танилцуулгыг нэгдсэн хуралдаанд танилцуулахаар тогтлоо. Эдийн засгийн байнгын хороо (2025.12.09) өнөөдрийн хуралдаанаараа таван асуудал хэлэлцэхээр товлосон бөгөөд хуралдаан Улсын Их Хурлын гишүүн Ц.Баатархүүгээс хагас коксон шахмал түлшний асуудлаар Эрчим хүчний сайдад хандсан асуулгын хариуны хэлэлцүүлгээр үргэлжиллээ хэмээн Улсын Их Хурлын Хэвлэл мэдээллийн газраас мэдээлэв.