Хөгжлийн банкны дуулиан, Капитал банкны дампуурал, Чингис хаан болон Үндэсний хөрөнгө оруулалтын банкны хүндрэлд Засгийн газрын нэр бүхий сайд өөрийн тойрон хүрээлэгчдээ толгойлон оролцсон гэдэг мэдээлэл олон нийтэд ил болж эхлэв.

Тэгвэл Shugeluleegch.mn-д төрийн 140 гаруй тэрбум төгрөг дампуурах нь тодорхой болсон Чингис хаан банк руу ороод, алга болсон хэргийн ард нэр бүхий сайд байгаа талаар баримт мэдээлэл  ирснийг нягтлан хүргэж байна. Энэ удаад нэр бүхий 2 иргэн 2019 оны наймдугаар сард хэдхэн хоногийн зайтай тус тусдаа хүсэлт гаргаж, Чингис хаан банкнаас нийт 9 тэрбум төгрөг гаргаж авсан баримтыг нэмэлт хачиргүй ил болгоё.

Иргэн “Г” овогтой “Б”  2019 оны найдугаар сарын 18-нд Чингис хаан банкнаас зээл хүссэн өргөдөлдөө “Миний бие Говь хувьцаат компанид самнасан ноолуур нийлүүлэхээр харилцан тохиролцсон. 2019 оны есдүгээр сарын 10-ны дотор бараагаа нийлүүлэхэд санхүүжилт шаардлагатай болсон тул 4,170,000,000 төгрөгийн урьдчилгаа олгож бидний ажилд туслалцаа үзүүлнэ үү” гэжээ.

Тэгвэл “Ц” овогтой “М” 2019 оны найдугаар сарын 30-нд Чингис хаан банкинд хандан “ОХУ-аас дизель түлш Моннис ХХК-д нийлүүлэх гэрээ хийсэн. Уг гэрээний урьдчилгаа төлбөр 2019.09.03-нд орж ирэх бөгөөд энэ хүрээнд ОХУ-д урьдчилгаа төлбөр болох 4,880,000,000 төгрөгийн урьдчилгаа олгож бидний ажилд тусална уу” хэмээн өргөдөл гаргасан байдаг аж.

Тэдний хүсэлтийг тухайн үед санхүүгийн хямралд орж, харилцагчдынхаа мөнгийг олгох чадваргүй болсон Чингис хаан банк шийдвэрлэж санхүүжилт олгож байжээ. Зээлийн олгосон баримтаас харвал нийт есөн тэрбумын зээл хүссэн 2 өргөдөл тус бүрдээ тал хуудас бөгөөд зээл  хүссэн иргэдийн нэг нь Дархан-Уул харьяат бол нөгөө нь Улаанбаатар хотын харьяат гэж өөрсдийгөө тодорхойлсон байна. Өөрөөр хэлбэл, арилжааны банкнаас зээл авахад шаарддаг ямар ч санхүүгийн баримт сэлт байхгүй гэдэг нь сонирхол татна.

Хөжлийн банк, Нийгмийн даатгалын сан, Эрүүл мэндийн даатгалын сан, төсвийн болон төрийн өмчит компаниудын мөнгө байршиж байсан ч төлбөрийн чадваргүй болж, дампуурах эрсдэлд байгаа Чингис хаан банкны эзэд нь ийнхүү харилцагчдынхаа мөнгийг үрэн таран хийсэн энгийн жишээ бол энэ. Баттай эх сурвалжийн мэдээлэл болон бидэнд ирүүлсэн баримтыг хөөж үзэхэд дээрх хоёр иргэн нэр бүхий сайдын гарын хүмүүс гэдэг нь батлагдаж байгаа юм. Улмаар Чингис хаан банкнаас төрийн сайдад өгсөн авлига гэж үзэх боломжтой. Эсвэл сайд төрийн мөнгийг зориудаар тус банкинд байршуулахад нөлөөлж, тойронд хүрээлэгчдээрээ дамжуулан хувьдаа гарган авсан болж таарч байгаа. Эдгээрийн учрыг тайлах баримтыг үргэлжлүүлэн хүргэх болно.