Япон, Монголын эмнэлэг нь Анагаахын шинжлэх ухааны их сургуулийн харьяа эмнэлэг бөгөөд “их сургуулийн эмнэлэг” гэх ойлголтыг манай улсад жишиг болгон хөгжүүлж буй анхны эмнэлэг юм. Их сургуулийн эмнэлэг нь боловсрол болон эрүүл мэндийн салбарын хослол ба сургалт судалгаа, эрдэм шинжилгээ, инноваци, хос бодлогыг хөгжүүлдэг онцлогтой.

Уг эмнэлэг нь Япон, Монголын ард түмний эв нэгдлийн бэлгэ тэмдэг гэгддэг ба Япон улсын засгийн газрын буцалтгүй тусламж, Монгол Улсын Засгийн газрын дэмжлэгээр 2019 онд ашиглалтад орсон. Өнөөдрийн байдлаар 376 үндсэн ажилтан, их сургуулийн 127 багш-эмчтэйгээр үйл ажиллагаагаа явуулж байна. Япон Монголын эмнэлэгээр үйлчлүүлэх иргэдийн тоо өссөөр байгаа ба өнгөрсөн 2019-2024 оны хооронд нийт 634.256 иргэнд амбулаторийн үзлэг хийжээ.

АШИУҮС-ийн захирал Дамдиндорж уулзалтын эхэнд сургуулийнхаа танилцуулгыг товчхон өглөө.

Анагаахын шинжлэх ухааны их сургууль нь жилд 3800 орчим оюутан төгсгөдөг байна. Өнөөдрийн байдлаар789 багш ажилтан ажиллаж, 16555 оюутан суралцаж байгаа аж.

2025 онд Анагаахын шинжлэх ухааны үндэсний их сургууль дэлхийн 60 мянга орчим сургуулиас 1237-д эрэмбэлэгджээ. Энэхүү жагсаалтыг Харвардын их сургууль тэргүүлдэг ба уг жагсаалтын 1237 гэдэг нь маш чанартай үзүүлэлт ба цаашид улам урагшлуулахаар ажиллаж буйгаа хэллээ.

Анагаахын шинжлэх ухааны их сургууль англи хэл дээр эмч төгсгөн ажиллаж буйгаа онцлов. Мөн гадаадын харьяалалтай 50 орчим оюутан суралцаж буй гэлээ. Анх удаа хүний их эмчийг магистрийн зэрэгтэй төгсгөдөг хөтөлбөрийг эхлүүлээд байгаа ба 2026 онд 47 оюутан төгсөх аж.

Мөн Анагаахын шинжлэх ухааны их сургуулийн орон нутаг дахь салбар сургуулиудын сургалтын чанар, сургалтын орчинг сайжруулахад сүүлийн үед түлхүү анхаарч ажиллаж буйгаа сургуулийн захирал мөн хэллээ.

Эрүүл мэндийн Ж.Чинбүрэн "Ангаахын боловсон хүчнийг цогц бэлтгэхэд сургууль өөрийн эмнэлэгтэй байх нь хамгийн чухал ба багш-эмчийн эрдэм, чадал үнэлж баршгүй их. Анагаахын сургалтыг эмнэлзүйтэйгээ нягт холбон хэрхэн хөгжүүлж ашиглаж буй нь тухайн улсын эрүүл мэндийн салбарын чанарын суурь байх болно. Их сургуулийн эмнэлгийн тогтолцоог хөгжүүлж бэхжүүлэхэд салбарын сайдын хувьд бүх талаар дэмжин ажиллах болно" гэв.

Цаашид өөрийн сургуулийн харьяа эмнэлэгтэй байх шаардларгыг анагаахын боловсрол олгодог сургуулиудад тавьж мөрдүүлдэг байх нь зөв гэж үзэж буйгаа илэрхийллээ. Энэ нь анагаахын чанартай боловсон хүчин бэлтгэн гаргах хамгийн том хүчин зүйл байх учиртай гэлээ.

Эцэст нь, Засгийн газраас 2026 оныг эрүүл мэндийг дэмжих жил болгож байгаатай холбогдуулан төсөв санхүү нэмэгдэнэ гэж итгэж байгаа. Үүнд тухайн сургууль эмнэлэг өөрийн гэсэн бэлтгэлтэй байж шинэ технологи, сургалтыг нэвтрүүлэхдээ анхаарч ажиллахыг хүслээ.