Цаг уур халахад хамгийн том хүчин нөлөөг үзүүлэгч бохирдлыг агаараас шүүж авах үлэмж хэмжээтэй тоос сорогч буюу дэлхийн хамгийн том агаар цэвэршүүлэгч станцыг Исландад байгуулж,  өчигдөр буюу тавдугаар сарын 08-наас ажиллаж эхэлжээ. Арилжааны зориулалттай “Маммот” нь тус улсад үйл ажиллагаа явуулдаг Швейцарийн Клаймуоркс компанийн хэрэгжүүлсэн хоёр дахь төсөл бөгөөд 2021 онд ашиглалтанд оруулсан Орка станцаас арав дахин том юм байна. “DAC” буюу агаараас шууд сорох технологи нь химийн бодисын тусламжтайгаар агаар дахь нүүрстөрөгчийг шүүж авах зарчимтай. Ийнхүү шүүсэн нүүрстөрөгчийг газрын гүнд хуримтлуулснаа дахин ашиглах эсхүл хатуу бүтээгдэхүүн болгох зорилготой гэж төслийг хариуцсан мэргэжилтнүүд нь тайлбарлав. Дараагийн үеийн цаг уурын шийдэл гэгдэж буй “DAC” технологийн ачаар ирээдүйд цаг уурын өөрчлөлт болон түүнээс үүдэх төрөл бүрийн байгалийн гамшгаас сэргийлэх найдвар төрж буй учир олон улсын Засгийн газар сонирхож байгаагаа мэдэгдээд байгаа юм байна.

“Маммот” станц нь жилд 36,000 тонн нүүрстөрөгчийг агаараас сорж, хуримтлуулах хүчин чадалтай. Энэ нь нэг жилд 7,800 шатахуун хөдөлгүүртэй автомашиныг хэрэглээнээс хассантай тэнцэх хэмжээний хүчин чадалтай гэсэн үг юм.