MrFalcon нэртэй фэйсбүүкийн хуудас хотын өнцөг булан бүрд очиж, хүмүүсийн тэвэгдэх ур чадварыг сорьсон бичлэг хийдгээрээ сүүлийн үед нийтэд түгээмэл болсоор байгаа билээ. Үүнтэй холбоотой нэгэн сонирхолтой мэдээлэл хүргэхэд тус пейжээс энэ сарын 25-нд улсын хэмжээний анхдугаар “Тэвгэн наадгай-2024”-ийг зохион байгуулахаар төлөвлөж, тэмцээний удирдамжаа баталжээ. Удирдамжинд дурдсаны дагуу “Тэвгэн наадгай-2024”-т Монгол Улсын 21 аймаг, Улаанбаатар хотоос дурын хүн оролцож болох бөгөөд нас заахгүй гэнэ. Тэмцээн энэ сарын 25-ны өглөө 10 цагт эхэлж, зургаан шат үргэлжлээд 17:00 цагт Монгол Улсын аварга тэвэгчинг тодруулж, шагнал гардуулна. Тэргүүн байрын шагнал 20,000,000 төгрөг, дэд байр 5,000,000 төгрөг, гутгаар байр 3,000,000 төгрөгийн шагналтай. Үндсний өв соёл, уламжлалаа сэргээн хойч үедээ өвлүүлж, залуучуудын цагийг зөв боловсон өнгөрөөхөд үнэтэй хувь нэмэр оруулах эерэг өнгө төрхтэй “Тэвгэн наадгай-2024” тэмцээнд оролцохыг хүсвэл MrFalcon фейсбүүкийн пейж рүү хандаж болох юм байна.