Төсвөөс “640 хүүхдийн сургалтын төлбөр” нэрээр Ерөнхий сайд Н.Учралын “Их засаг кинг” сургуульд 3 тэрбум 520 сая төгрөгийг буцалтгүйгээр олгох гэж байсан асуудлын баримтыг Сангийн яамнаас УИХ-ын гишүүдэд тараасан. Гэтэл өөрийгөө 2026 оны төсвийн тодотголыг зохиосон гэх Сангийн сайд З.Мэндсайханаас эхлээд Боловсролын сайд Л.Энх-Амгалан хүртэл Ерөнхий сайд Н.Учралын “Гэрт ойрхон сургууль-хамгийн сайн сургууль” хөтөлбөрийн санхүүжилт 50 тэрбумыг задаргаа эксель файлыг хараагүй гэж мэлзэв.

Тэгвэл Боловсролын сайд Л.Энх-Амгалан энэ талаар ам нээхдээ “Төсвийн тодотголтой холбоотой буруу ташаа мэдээллийг улс төрийн ашиг хонжоо олохоор санаатайгаар гуйвуулж буйд харамсаж байна. Хуульд төсвөөс санхүүжих бүх жагсаалт нэгбүрчлэн нэр, байршил, санхүүжих дүнгээрээ баталдаг. Улсын төсвийн тодотголыг дагаж ямар нэгэн хувийн сургуульд санхүүжилт, тоног төхөөрөмж өгөх, тэр тусмаа тэр сургуульд ийм санхүүжилт өгнө гэдэг ийм жагсаалт батлагдаагүй шүү. Ийм жагсаалт өргөн баригдаагүй гэдгийг төсөв өргөн барьсан сайдын хувиар хариуцлагатайгаар мэдэгдэж байна” гэлээ.

Мөн Ерөнхий сайд Н.Учрал болон “Их засаг кинг” сургуулийн эзэн гэх түүний ээж Ж.Цэцэгмаа, Сангийн сайд З.Мэндсайхан нар энэ удаагийн дуулианыг намжаахаар хэрхэн үгүйсгэл хэлснийг бүгд харсан байх. Хамгийн гол нь Ерөнхий сайд Н.Учрал АН-ын гишүүдтэй уралдан, АТГ-т өөрийгөө шалгуулахаар хандсан барьц алдсан үйлдэл нь “Арай ч үгүй байлгүй дээ” гэсэн хүлээлттэй улс төрийн хүрээнийхний анхаарлыг татав. Товчхондоо, төсвийн тодотголыг хэлэлцэн батлах гэж байгаа УИХ-ын гишүүдийн дунд маш том асуултын тэмдэг үлдээлээ. 

Төрийн нарийн бичгийн дарга буюу албаны хүний үг ийнхүү үгүйсгэгдэх шинжтэй. Гэвч Сангийн яамнаас УИХ-д, тэр дундаа Өргөдлийн байнгын хорооны гишүүдэд тараасан танилцуулга бүрэн эхээрээ ил болчихлоо. Үйлд явдлыг өрнөлийн нэг талд Сангийн яамнаас тараасан баримт, Төрийн нарийн бичгийн даргын үг байгаа бол нөгөө талд Ерөнхий сайд тэргүүтэй Засгийн газрын гишүүдийн байр суурь байна. Маргааш гэхэд баримт байр суурьд ялагдах эсэх нь тодорхой болно. Эсвэл энэ удаагийн төсвийн тодотгол бүхэлдээ нурна.