МАН-ын Удирдах зөвлөлөөс Хууль зүй, дотоод хэргийн сайдаар УИХ-ын Аюулгүй байдал гадаад бодлогын байнгын хорооны дарга Г.Тэмүүлэнг томилохыг дэмжлээ. Энэ бол МАН-аас Ерөнхий сайд намын дарга Н.Учралын Засгийн газарт үзүүлж байгаа улс төрийн яаралтай түргэн тусламж гэвэл үнэн ойр. Төсвөөс хувийн сургуульдаа 3.5 тэрбум төгрөгийн  дэмжлэг үзүүлэх ашиг сонирхлын зөрчилд холбогдоод буй Ерөнхий сайд Н.Учрал сөрөг хүчин АН төдийгүй МАН доторх эсрэг бүлэг фракцынхаа шахалтаар гүйцэтгэх засаглалын тэргүүний суудлаа өгөх эрсдэлд ороод байгаа.

Хэрэв Үндэсний эвслийн тэргүүн Н.Номтойбаяр Засгийн газраас гарсан тохиолдолд Н.Учралын УИХ дахь дэмжлэг автоматаар буурна. Сөрөг хүчний Ерөнхий сайдыг огцруулах улс төрийн акц ч хүчээ авах эрсдэлтэй тулгараад байлаа. Тэгвэл Н.Учрал тэргүүтэй МАН-ын ах нарынх нь зүгээс энэхүү эрсдэлийг Н.Номтойбаярын дотнын анд Г.Тэмүүлэнг Хууль зүй, дотоод хэргийн сайдаар томилгоогоор хааснаар Засгийн газраа авч үлдэх ээлжит алхмаа хийлээ.