Ашигт малтмал, газрын тосны газрын даргын албан үүргийг түр орлон гүйцэтгэж байсан Ш.Ганхуягийг “Зөвзүг” ХХК-ийн эцсийн өмчлөгч Эдвард Сүрэнгээс 2.7 тэрбум төгрөгийн хахууль авсан хэрэгт холбогдуулж, АТГ-ын Мөрдөн шалгах хэлтэст шалгаж буй талаар мэдээлсэн.

Тодруулбал, “Олон-Овоот гоулд” ХХК-иас 148.5 тэрбум төгрөг гаргуулан “Зоос”, “Хадгаламж”, “Анод” банкны эрх хүлээн авагчид олгуулахаар шийдвэрлэсэн. Шийдвэрийн дагуу шүүхийн шийдвэр гүйцэтгэх байгууллага 2012 оноос хойш ажиллагаа явуулж буй. Энэ хүрээнд барьцаа хөрөнгө болох Өмнөговь аймгийн Мандал-Овоо сумын нутаг дахь ашигт малтмалын найман тусгай зөвшөөрлийг Монголбанкнаас томилогдсон Банкны эрх хүлээн авагчид шилжүүлсэн.

Гэвч Монголбанкнаас томилогдсон Банкны эрх хүлээн авагчид шилжүүлсэн ашигт малтмалын тусгай зөвшөөрлийг АМГТГ-ын даргын албан үүргийн түр орлон гүйцэтгэгч Ш.Ганхуяг 2025 оны тавдугаар сарын 06-нд “Олон-Овоот гоулд” болон “Зөв зүг” ХХК-ийн эзэмшилд шилжүүлж, үүнийхээ хариуд 2.7 тэрбум төгрөг бусдаар дамжуулан хахуульд авсан хэрэгт холбогдсон юм.
Ингэж албан тушаалаа урвуулан ашигласнаар улсад 148.5 тэрбум төгрөгийн хохирол учруулсан хэмээн буруутгагдаж буй.
 
УИХ-ын гишүүн Ц.Тувааны шадар туслахаар ажиллаж байгаад Аж үйлдвэр, эрдэс баялгийн сайд болоход нь АМГТГ-ын дарга болсон Ш.Ганхуяг нь Г.Ган-Од гэх хүнтэй бүлэглэн Э.Сүрэнгийн ашигт малтмалын тусгай зөвшөөрлөө буцаан авах ашиг сонирхлын үүднээс албаны чиг үүргээ хэрэгжүүлэхийн тулд хахууль өгөхийг шаардаж, нийт 2.7 тэрбум төгрөгийг дансаар дамжуулан авсан, мөнгө угаасан, үндэслэлгүй хөрөнгөжсөн хэмээн НПГ-аас яллах дүгнэлт үйлдсэн билээ.

Тэдний хахуульд авсан мөнгөнөөс нэг тэрбум нь эзэндээ хүрэлгүй царцаагдсан аж. Харин хэний дансанд орох байсныг шүүх хурлын үеэр яллагдагч нар мэдүүлэх, эсэхийг харах үлдлээ.
Эргэн сануулахад, “Жаст”-ын Ш.Батхүүгийн нэр дээр байсан тусгай зөвшөөрлүүдийг “Алтжин”-гийн гэх нэрээр нь монголчууд мэддэг Г.Алтан агсан худалдан авснаар “Олон-Овоот гоулд” ХХК түүний хамаарал бүхий хүмүүсийн нэр дээр шилжсэн байдаг. Үүнээс өмнө Ш.Батхүү нар “Олон-Овоот гоулд”-ын тусгай зөвшөөрлүүдийг “Зоос”, “Анод”, “Хадгаламж” банканд барьцаалан, 140 гаруй тэрбум төгрөгийн зээл авсан ч буцаан төлөөгүй юм. Ингэснээр төрд буюу Монголбанк, Сангийн яаманд дээрх 148.5 тэрбум төгрөгийн хохирол  учирсан аж.
Ш.Батхүү, Г.Алтан, Э.Сүрэн зэрэг хүнд холбогдох хэргийг шүүх эцэслэн шийдвэрлэхдээ алтны уурхайн дээрх тусгай зөвшөөрлүүдийг Монголбанкны харьяанд байгуулсан охин компани болох “Минерал эксплорэйшн фандинг” ХХК-д шилжүүлэхийг даалгасан. Уг шийдвэрийн дагуу АМГТГ-ын Кадастрын хэлтсийн даргын тушаалаар “Олон-Овоот гоулд”, “Зөвзүг” ХХК-ийн эзэмшилд байсан тусгай зөвшөөрлүүдийг “Минерал эксплорэйшн фандинг”-д 2024 оны намар шилжүүлээд байж.

Гэтэл АМГТГ-ын даргын албан үүргийг түр орлон гүйцэтгэгчээр ажиллаж байхдаа Ш.Ганхуяг өнгөрсөн тавдугаар сард уг тушаалыг хүчингүй болгож, буцаан олгохоор шийдвэрлэсэн нь тодорхой болсон. Үүнийхээ хариуд 2.7 тэрбум төгрөгийн хахууль авсан бөгөөд уг мөнгөө Чингэлтэй дүүргийн IV хорооны нутагт барьж буй объектод хөрөнгө оруулалт нэрээр шилжүүлж, угаасан нь тодорхой болсон юм.