Дэлхий дахин

Гадаад: Автомашины түлшний савыг дүүргэх зардал түүхэн дээд хэмжээнд хүрээд байна

2026/09/22
Европын Комиссын сүүлийн 20 жилийн хугацааг хамарсан мэдээллээс үзэхэд, Европын холбооны хэмжээнд автомашины түлшний савыг дүүргэх зардал түүхэн дэх хамгийн өндөр түвшинд хүрээд байна. Одоогийн дундаж үнээр тооцвол 50 литрийн багтаамжтай савыг бензинээр дүүргэхэд ойролцоогоор 103 евро, харин дизель түлшээр дүүргэхэд 108 евро зарцуулагдаж байна.

Ойрхи Дорнодод мөргөлдөөн эхэлснээс хойш шатахууны жижиглэнгийн үнэ огцом өсөж, инфляцийн дарамтыг нэмэгдүүлж байна. Европын Төв банкны мэдээлснээр, Евро бүсэд эрчим хүчний үнийн өсөлт (инфляци) долоодугаар сард 10.3 байсан бол өнгөрсөн сард 14.3 хувь болж нэмэгджээ. Энэ сарын 14-ний байдлаар ЕХ-ны хэмжээнд нэг литр бензиний дундаж үнэ 2.063 евро, харин дизель түлшний үнэ 2.159 евро болсон байна. Эдгээр нь Европын Комиссын 2005 оноос хойш хөтөлж буй статистик мэдээллийн түүхэн дэх хамгийн өндөр үзүүлэлтүүд юм.

Бензиний үнэ өмнө нь 2022 онд дээд цэгтээ хүрч байсан бол дизель түлшний үнэ энэ оны дөрөвдүгээр сард одоогийн түвшиндээ дөхөж байв. ЕХ-ны улс орнуудын дунд үнийн зөрүү их байна. Бензин хамгийн хямд буюу литр нь 1.34 еврогийн үнэтэй нь Мальта, харин хамгийн үнэтэй буюу 2.56 еврогийн үнэтэй нь Дани байна. Дизель түлшний хувьд үнэ нь Мальтад литр тутамд 1.21 евро, Финландад 2.51 еврогийн хооронд хэлбэлзэж байв. Хоёрдугаар сарын сүүлээр Ирантай дайн эхэлж, Ормузын хоолойгоор дамжих эрчим хүчний нийлүүлэлт тасалдсанаас хойш түлшний үнэ хэдэн сарын турш өссөөр байна.

Мөргөлдөөний оргил үед олон улсын зах зээл дэх "Brent" маркийн газрын тосны үнэ 126 ам.доллароос давж байсан бол баасан гарагт ирэх сард нийлүүлэгдэх газрын тосны үнэ нэг баррель нь 104 ам.доллароос дээш түвшинд арилжаалагджээ. Дайн эхлэхээс өмнө "Brent" маркийн газрын тосны үнэ нэг баррель нь 72 орчим ам.доллар байв.

Европын хоёр газрын тос боловсруулах үйлдвэрт урт хугацааны гэрээгээр газрын тос хүлээн авахгүй гэж мэдэгдсэний дараа Европын түүхий эдийн нийлүүлэлт цаашид тасалдах болно гэж “Bloomberg” мэдээлжээ.

Европын түлшний үнийг юу өндөр болгож байна вэ

Гэхдээ түүхий эдийн үнэ нь бензин, дизель түлшний үнийг өсгөж буй цорын ганц хүчин зүйл биш юм. Боловсруулах зардал болон ашгийн хэмжээ мөн мэдэгдэхүйц өссөн нь үнэд дарамт учруулж байна. Боловсруулах ашгийн хэмжээ нь түүхий газрын тосны өртөг болон бензин, дизель түлш зэрэг боловсруулсан бүтээгдэхүүний үнийн зөрүүг тусгадаг. Европын Төвбанкны мэргэжилтнүүд “Euronews Business”-д дизель түлшний ашгийн хэмжээ аравдугаар сар хүртэл хамгийн өндөр цэгтээ хүрэхгүй гэж мэдэгджээ.  2026 оны эхнээс хойш Европын холбооны дундаж бензиний үнэ 29 орчим хувиар өссөн бол дизель түлшний үнэ бараг 40 хувиар өссөн байна.


Шатахууны үнэ цаашид өсөх үү

Энэ сарын 10-нд нийтлэгдсэн Европын Төв Банкны мөнгөний бодлогын мэдэгдэлд "Эрчим хүчний хангамжийн тасалдал дахин нэмэгдэх нь эрчим хүчний үнийг одоогийн хүлээлтээс илүү удаан хугацаанд өсгөхөд хүргэж болзошгүй" гэж анхааруулсан байна. Европ Төв Банкны мэргэжилтнүүд Ойрхи Дорнодын мөргөлдөөнийг зогсоож, эрчим хүчний урсгалыг сэргээх нь үнийг бууруулах гол хүчин зүйл болно гэж мэдэгджээ. "Бензин, дизель түлшний үнэ буурахын тулд гол хүчин зүйл нь Ойрхи Дорнодын дайныг зогсоох, Ормузын хоолойгоор дамжин өнгөрөх урсгалыг хэвийн болгох, газрын тосны нөөцийг сэргээх боломжийг олгохын тулд дэлхийн цэвэршүүлэх үйл ажиллагааг сэргээх явдал юм" гэжээ.

Холбоотой мэдээ

Хятад улс гадаадын иргэд ажиллах боломжтой 100 мянга гаруй ажлын байр зарлажээ
“Эрдэнэт үйлдвэр”-ийн захирал асан Ц.Даваацэрэнгийн хорих ялыг өөрчилж, зорчих эрхийг нь хязгаарлав
Сонгинохайрхан дүүрэгт жишиг өрхийн эмнэлэг ашиглалтад орлоо

Сэтгэгдэл бичих

Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд SHUGELULEEGCH.mn хариуцлага хүлээхгүй.
Сэтгэгдэл 0