Их Британид төвтэй хөрөнгө оруулалтын Palliser Capital сан Рио Тинто компани Лондонгийн хөрөнгийн биржээс Австралийн хөрөнгийн бирж рүү хөрөнгөө шилжүүлэх ёстой гэж мэдэгдлээ. Ингэснээр Рио Тинто компанийн хувьцааны өгөөж бараг 40% өсөх боломжтой гэж дүгнэсэн байна. Хөрөнгийн биржийн давхар бүртгэл нь Рио Тинтогийн хувьцааг худалдах, худалдан авах ажиллагаанд саад учруулж байгаа гэж мэрэгжилтнүүд дүгнэж байна.

Санхүүгийн шинжилгээний алдарт Financial Times сэтгүүлийн мэдээлснээс харвал Лондонд бүртгэлтэй “Рио Тинто” компанийн хувьцааны үнэлгээ Австралийн хөрөнгийн биржид бүртгэлтэй хувьцааныуудын үнэлгээнээс 27 тэрбум ам.доллароор бага байгаа юм. Тус компанийн дийлэнх ашиг Австралиас бүрддэг ч компанийн нийт хувьцааны 77% Их Британид төвтэй хөрөнгө оруулагчид эзэмшдэг юм. Компанийн хувьд ямар нэгэн төсөв, бүтцийн болон аливаа өөрчлөлт хийхээр бол Австрали, Их Британийн хөрөнгө оруулагчдаас заавал зөвшөөрөл авдаг билээ.

“Рио Тинто” компани 1995 оны 12-р сараас хойш давхар бүртгэлтэй болсон байна. Хэдий тийм ч хөрөнгө оруулагчдын шахалт ямар байхаас үл шалтгаалан хөрөнгийг шилжүүлэх тухай асуудал нэн тэргүүний зорилт биш гэдгийг “Рио Тинто”-гийн удирдлагууд тодорхой хэлсэн юм.