УИХ-ын даргад Монголбанк, Санхүүгийн зохицуулах хороо, Үндэсний аудит гэсэн хэдхэн газрын удирдлагыг нэр цохон дэвшүүлэх эрх бий. Гэхдээ тэд нь асар их эрх мэдэл, хяналт атгадаг. Монголбанк арилжааны банкуудыг хянадаг бол Санхүүгийн зохицуулах хороо банк бус санхүүгийн байгууллага, хадгаламж зээлийн хоршоо, койн, алт, ломбард, үнэт цаасны арилжаа зэргийг бүхэлд нь хянадаг. Аудит төрийн мэдлийн бүх байгууллагын санхүүг хянадаг гэх мэт маш том системд УИХ-ын дарга алсуураа нөлөөлөх боломжтой. Улс төрийн нөлөөллөө томилсон хүнээрээ дамжуулан хэрэгжүүлэх аварга хонгил суваг гэсэн үг.

УИХ-ын дарга С.Бямбацогт ч энэ боломжийг алдахгүйг хүсэж, Санхүүгийн зохицуулах хорооны даргын томилгоонд хүч хаяж байна. Гэвч түүний Санхүүгийн зохицуулах хорооны даргыг сольж, өөрийн хүнээ томилуулах оролдлого өнгөрсөн долоо хоногт бүтэлгүйтсэн. Эх сурвалжуудын мэдээлж буйгаар, өнгөрсөн хугацаанд хөрөнгийн зах зээл болон асар их хэмжээний нууц хөрөнгө эргэлдүүлдэг болсон банк бус санхүүгийн байгууллагын эздийн ашиг сонирхлын үүднээс Санхүүгийн зохицуулах хорооны дарга Т.Жамбаажамцыг албан тушаалаас нь шахах болсон. Т.Жамбаажамц ч үүнийг ойлгож, өөрийн хүсэлтээр албан тушаалаа өгөх өргөдлөө УИХ-ын Эдийн засгийн байнгын хороонд хүргүүлжээ. Байнгын хороо Т.Жамбаажамцыг чөлөөлөхийг дэмжсэн ч УИХ-ын нэгдсэн чуулганаар нууц санал хураалт явуулахад дэмжигдээгүй. Ийнхүү УИХ-ын олонхын шийдвэр дарга С.Бямбацогтын эсрэг гарч, Санхүүгийн зохицуулах хорооны даргыг чөлөөлж чадаагүй.

УИХ-ын дарга энэхүү бүтэлгүйтлийнхээ үеэр “Монголын ард түмэн банк бус санхүүгийн байгууллагын зээлийн хүүгийн дарамтад орсон байна. Апликэйшний зээлийн хүү 60 хувь, банк бусын зээлийн хүү 40 хувь болчихсон. Энэ зээлийн хүүг бууруул, иргэдээс зээлийн хүүнээс гадна элдэв шимтгэл авдгийг болиул гэсэн. Гэтэл энэ үүрэг даалгавар биелэхгүй байна. Үүнийгээ өөрөө хүлээн зөвшөөрөөд өргөдлөө өгч байгаа. Халж сольсон зүйл байхгүй" хэмээн ууртайгаар мэдэгдэж харагдана лээ. Тэгвэл УИХ-ын дарга С.Бямбацогт эрх мэдлээ ашиглан Т.Жамбаажамцыг чөлөөлөх асуудлыг энэ долоо хоногийн чуулганы нэгдсэн хуралдаанаар дахин хэлэлцүүлэхээр болсон байна. Өмнө нь УИХ-ын даргаар хэн ч ажиллаж байсан олонхын саналаар унасан асуудлыг эрх мэдлийнхээ ашиглан ингэж дахин оруулж байсан тохиолдол гарч байгаагүй.

Улс төрийн хүрээнд бол энэхүү халаа, сэлгээ хэдийнэ яригдаж эхлээд байсан. Төрийн ордонд УИХ-ын дарга С.Бямбацогт өөрийн шадар хүн Ц.Одхүүг арилжааны зарим банкнаас ч их хэмжээний хөрөнгө эргэлдүүлэн, мөнгө угааж, хүүлдэг банк бус санхүүгийн байгууллагуудын хяналтын даргаар тавих гэж байгааг мэр сэр ярилцаад хэдэн долоо хоногийн нүүр үзэж байгаа. Учир нь Т.Жамбаажамц УИХ-ын дарга асан Д.Амарбаясгалангийн үед томилогдсон, Санхүүгийн зохицуулах хороонд мэргэжилтнээс эхлээд 20 жил ажиллаж боловсорсон зэрэг нь улс төрийн захиалгаа шууд хэрэгжүүлэхэд саад болсон зэрэг мэдээлэл байгаа юм.