УИХ 2027 оны төсвийг түүхэнд байгаагүй өндөр зардалтай баталсны араас Засгийн газрын сайд нар зарцуулах мөнгөө голон хошуугаа унжуулж эхэллээ.

Эрчим хүчний сайд Б.Найдалаа “Эрчим хүчний салбарт 479 тэрбум төгрөгийн төсөв батлагдлаа. Үүний 261 тэрбум нь хөрөнгө оруулалтын зардал. Харамсалтай нь, 261 тэрбум төгрөг бол эрчим хүчний салбарын засвар, шинэчлэлд үнэхээр хангалтгүй төсөв. Оюутолгойн ногдол ашгаар санхүүжүүлэх овоо дорвитой төсөв явж байсан боловч зарим гишүүний зүгээс үндэслэлгүй улстөржилт хийснээр татагдсан. Тэгэхээр 2027 онд эрчим хүчний салбарт олигтой хөрөнгө оруулалт хийгдэхгүй гэсэн үг” хэмээн гоморхож, ялархав. Сайд энэ байдлаараа ирэх өвөл, хавар тог цахилгаан тасрахад “Төсөв баталж өгөөгүй биз дээ” гэдэг хэлэх үгтэй сууж байх шинжтэй.

Тэгвэл Аж үйлдвэр, эрдэс баялгийн сайд Г.Дамдинням “Манайд 100 гаруй тэрбум төгрөг тавьдаг. Манай яам улсын төсөвт хамгийн их орлого оруулж, хамгийн бага төсөв зарцуулдаг. Худалдан авах ажиллагаа энэ тэр байдаггүй” гэж голонгуй хэлэв. Энэ мэтээр олон зуун тэрбумын төсвөө голох сайд нар байгаа бол чамлахаар чанга атга гэдэг үг хэлэх сайд ч бас байна. Тухайлбал, Шадар сайд  Н.Номтойбаяр “Байгаа бололцоондоо тааруулан ажиллана. Төсвөөс гадуурх боломж бололцоог дайчилна” гэдэг зүйл хэлээд зогсож байгаа.

Ерөнхий дүнгээрээ 2027 оны төсөв 41.5 их наядын зарлагатай батлагдаж, 2.3 их наяд төгрөгийн алдагдал үйлдвэрлэх дүр зураг гарч байна. Хэрэв ирэх жил эдийн засгийн байдал өнөөгийнхөөс дордвол, орлого тасалдаж, алдагдал үржигдээд явна гэдэг эдийн засгийн төлөв бий.

Иймд нөхцөлд төсвийн зардлаа 10 их наядаар нэмэгдүүлэх цочирдом шийдлийг Ерөнхий сайд Н.Учралын Засгийн газар гаргаж, түүн дээр УИХ ажиллаад Оюутолгойгоос орж ирээгүй мөнгө болох 2 их наядыг нь хассан. Үүнд уурссан сайд нар зарцуулах мөнгөн дүнгээ дээрх байдлаар голонгуй тайлбарлаад байгаа. Харин УИХ-ын гишүүн Б.Жаргалан “Хувийн хэвшлийг зах зээлээс шахсан, үнийн өсөлтийг улам өдөөх, авлига, хулгайг гааруулах эрсдэлтэй, улсын өрийг давхар нэмэгдүүлсэн данхайсан төсвийг зогсоож чадсангүй ээ. Уучлаарай” хэмээн 2027 оны төсвийг бүхэлд нь дүгнэсэн байна. Гэвч төсвөө тогтоосон хугацаанд нь батлахгүй бол тарах хуультай УИХ-ын олонх “2027 оны Ерөнхийлөгчийн сонгуулийн сурталчилгааны зардал” гэж тодорхойлогдож буй төсвийг баталж орхилоо.

41.5 их наяд төгрөг гэдэг бол Монгол Улсын түүхэнд байгаагүй өндөр зардал бөгөөд дарга нарын хувьд төдий тансаглал. Ер нь тэгээд улстөрчид, ялангуяа төсөв мөнгө зарцуулах эрх атгаж байгаа сайд нарт 100 их наяд төгрөг зарцуулах эрх өгсөн ч ханаж цадахгүй шүү дээ.