Сонгуулийн ерөнхий хороо өчигдөр хуралдаж Монгол Улсын Их Хурлын 2024 оны ээлжит нэр дэвшигчдийг бүртгэх эсэх асуудлыг хэлэлцжээ. Хэлэлцэн үзээд эрх баригч Ардын намаас 3, Ардчилсан намаас нэг нэр дэвшигчийг бүртгэхээс татгалзсан байна. 

Улмаар нэр дэвшигчид тавигдах шаардлага хангаагүй 154 хүнийг нэр дэвшигчээр бүртгэхээс татгалзжээ. Тухайлбал татварын хугацаа хэтэрсэн өр төлбөртэй 76, хууль заасан баримт бичиг дутуу 63, шүүхийн хүчин төгөлдөр тогтоолоор ял эдэлж байгаа тав, нэр дэвшүүлсэн нам, эвслээсээ өөр намын гишүүн дөрөв, сонгуулийн тойргоос 801-ээс доошгүй гарын үсэг цуглуулах шаардлага хангаагүй дөрөв, төрийн жинхэнэ алба хаагч хуулийн хугацаанд албан тушаалаасаа чөлөөлөгдөөгүй, авлига, албан тушаалын гэмт хэрэг үйлдсэн нь шүүхээр тогтоогдсон тус бүр нэг нэр дэвшигчийг бүртгэхээс татгалзжээ.

Татгалзсан нэр дэвшигчид Монгол Улсын Их Хурлын Сонгуулийн тухай хуулийн 33 дугаар зүйлийн 33.2-т заасны дагуу 2024 оны зургаадугаар сарын 2-ны өдрийн дотор заасан зөрчлийг арилгаж, дахин бүртгүүлэх материалыг СЕХ-нд ирүүлэх боломжтой юм байна.