Улаанбаатар хотын метро барих зөвлөх үйлчилгээний тендерт БНСУ-ын “Dohwa Engineering” компанийн түншлэл шалгарсан тухай Нийслэлийн засаг дарга бөгөөд Улаанбаатар хотын захирагч Х.Нямбаатар мэдээллээ. Тендерийн хоёрдугаар шатанд Орос, Хятад, Өмнөд Солонгос, Энэтхэгийн компаниуд бичиг баримтаа ирүүлсэн бөгөөд ийнхүү Өмнөд Солонгосын компанийн түншлэл шалгарлаа.

“Бидний урьдчилан тооцож сонгон шалгаруулалттай холбоотой элдэв маргаан үүсэхгүй тохиолдолд тав хоногийн дараа шалгарсан компанитай гэрээний үндсэн хэлэлцээ эхэлнэ. Захиалагчийн чиг үүргийг хэрэгжүүлэгч компани нь геологийн судалгаа хийхээс гадна уг тендерийн үндсэн дизайн гаргах, цаашлаад MPC тендерийн жишиг баримт бичиг боловсруулах зэрэг чиг үүрэг гүйцэтгэж манай талд яаралтай өгөх ёстой”  гэж Нийслэлийн засаг дарга бөгөөд Улаанбаатар хотын захирагч Х.Нямбаатар ярьсан юм.

Тендерт шалгарсан "Dohwa Engineering" компани нь 145.91 тэрбум төгөргийн үнийн санал ирүүлжээ. Түншлэлийн толгой компани болох тус компани нь Ази, Африк, Латин Америкийн орнуудад голлох метроны төслүүдийг хэрэгжүүлсэн туршлагатай бөгөөд Азийн хөгжлийн банктай хамтран Монгол Улсад гэр хорооллын дахин төлөвлөлтийн төсөл хэрэгжүүлж байгаа юм.

Түншлэлд багтсан Солонгосын үндэсний төмөр замын компани нь Өмнөд Солонгосын төмөр замын голлох төслүүд болон өндөр хурдны дөрвөн томоохон төсөлд хэрэгжүүлэгчээр ажиллаж байжээ. Солонгосын төмөр замын корпорацын компанийн гол түншийн нэг. Ази тивийн 15, Европын гурав, Африкийн дөрөв, Өмнөд Америкийн таван улсад төмөр замын төсөл хэрэгжүүлж байсан туршлагатай.

Түншлэлд багтсан дараагийн компани нь “Korail” буюу Солонгосын төмөр замын корпорац нь Филиппин улсын нийслэл Манила хотын метроны долоодугаар шугамд барилгын явцын зөвлөх үйлчилгээний тендерт ялж 23 сая ам.долларын төсөл амжилттай хэрэгжүүлсэн. Үүнээс гадна төмөр зам болон метроны 10 гаруй томоохон төсөл хэрэгжүүлсэн туршлагатай компани аж.

Түншлэлийн өөр нэг компани болох “Soosung” компани нь Өмнөд Солонгосдоо төмөр зам, дэд бүтцийн 500 гаруй төсөлд оролцож байсан туршлагатай. Төмөр зам, дэд бүтцийн төслийн ТЭЗҮ, суурь судалгааны ажил хийдэг, Ази, Африк, Өмнөд Америк дахь төслүүдийн судалгааны ажил дээр сүүлийн 20 жил төвлөрч үйл ажиллагаа явуулж буй компани юм.
Метроны бүтээн байгуулалтын ажил 2025 онд эхлэх товтой байна.