УИХ-ын ээлжит сонгуульд нэр дэвшигчдийн бүртгэлээс харвал 61% эрэгтэй, 39% эмэгтэй улстөрчид эзэлж байна. Энэ бол тойрогт нэр дэвшсэн болон жагсаалтаар нэр дэвшсэн улстөрчдийг нэгтгэсэн тоон үзүүлэлт. Харин тойрогт нэр дэвшигчдийн 35% нь, жагсаалтаар нэр дэвшигчдийн 50% нь эмэгтэйчүүд байгаа юм. Энэ удаагийн сонгуульд бие даан нэр дэвшигчдийн ердөө 2% нь л эмэгтэйчүүд байна.

УИХ-ын Сонгуулийн тухай хуульд нийт нэр дэвшигчдийн 30-аас доошгүй хувь нь, 2028 оны ээлжит сонгуулиар 40-өөс доошгүй хувь нь аль нэг хүйсийнх байхаар тусгасан билээ.

Ардчилсан чөлөөт сонгуулийг 1992 оноос хойш явуулснаас эхлэн тооцвол 1992 оны анхны сонгуульд 293 хүн нэр дэвшсэнээс ердөө дөрөв нь л эмэгтэй нэр дэвшигч байжээ. Харин 2020 онд 606 хүн нэр дэвшсэний 151 нь эмэгтэй нэр дэвшиж, үүнээс 13 нь сонгогдож байсан юм. Хэдийгээр сонгуульд нэр дэвших эмэгтэйчүүдийн тоо нэмэгдэж байгаа ч сонгогдох хувь нь бага байсаар өнөөтэй золгожээ. НҮБ-ын дэвшүүлсэн “Тогтвортой хөгжлийн зорилт”-д аливаа улс орнуудад шийдвэр гаргах түвшин дэх эмэгтэйчүүдийн оролцоог нэмэгдүүлэхээр тусгасан байдаг юм.