"Парис 2024" зуны Олимпын эхний гурван өдрийн байдлаар Япон улсын шигшээ баг зургаан алтан медаль хүртсэн амжилтаар тэргүүлж байна. Тус улсын тамирчид скейтборд, жүдогийн төрлөөр тус бүр хоёр, туялзуур жад, гимнастикийн төрөлд түрүүлжээ. Скейтбордын эмэгтэйчүүдийн төрөлд 14 настай Коко Ёшизава түрүүлсэн нь одоогоор энэ олимпын хамгийн залуу аварга болсон билээ. Харин туялзуур жадны хүнд төрөлд Японы тамирчин Коки Кано аваргалсан нь тус улсын хувьд энэ төрөлд хүртсэн анхны алтан медаль болов.

Медалийн тоо болон чанараар хоёрдугаарт Олимп зохион байгуулагч Франц улс. Жүдогийн төрөлд хамгийн олон буюу таван медаль хүртсэн ч алтан медаль авч амжаагүй байна. Францчууд туялзуур жадны төрөлд олимпоос хамгийн олон медаль хүртсэн уламжлалаа хадгалж нэг алт, гурван мөнгөн медаль хүртжээ. Мөн регбийн төрлөөр өмнө нь гурван мөнгөн медаль хүртэж байсан бол энэ удаа эрэгтэйчүүдийн төрөлд анхны алтан медалиа авсан байна.

БНХАУ-ын баг усанд үсрэлт, буудлагын төрлөөс таван алт "түүсэн" бол австраличууд таван алтныхаа гурвыг усанд сэлэлтээс авлаа. БНСУ-ын усанд сэлэгчид олимпод нэг алт, гурван мөнгөн медаль хүртсэн түүхтэй бол Парисын олимпоос анхны хүрэл медальтан тодорчээ. Америкчууд нийт 20 медаль авсан ч ердөө гуравхан алттайгаар зургаадугаарт жагсаж байна. Канад болон Узбекистан улс жүдогоор олимпын анхны алтан медалиа бичүүлсэн билээ.

Одоогоор 17 улс алтан медаль хүртсэн бол нэг мөнгөн медаль хүртсэн Монгол тэргүүтэй долоон улс байна. Нийт 36 улс ямар нэгэн медаль хүртжээ.

Медаль хүртсэн эхний 10 улс (Медалийн чанараар)