ОХУ-ын Ерөнхийлөгч Владимир Путин Монгол Улсын Ерөнхийлөгч У.Хүрэлсүхийн урилгаар ирэх есдүгээр сарын 03-ны өдөр Монгол Улсад айлчлах тухай Кремлийн хэвлэлийн албанаас эш татан ТАСС агентлаг мэдээллээ. Айлчлалынхаа үеэр Халхын голын байлдааны ялалтын 85 жилийн ойн ёслолд оролцох юм.

Түүнчлэн уг айлчлалын үеэр хоёр улсын төрийн тэргүүн нар иж бүрэн стратегийн түншлэлийн харилцааг цаашид хөгжүүлэх хэтийн төлөвийг хэлэлцэж, олон улсын болон бүс нутгийн тулгамдсан асуудлаар санал солилцож, хэд, хэдэн баримт бичигт гарын үсэг зурах юм байна.

Олон улсын эрүүгийн шүүхээс 2023 оны гуравдугаар сард ОХУ-ын Ерөнхийлөгч Владимир Путиныг баривчлах тогтоол гаргаж байсан юм. Монгол Улс Олон улсын эрүүгийн шүүхийн Ромын дүрмийг 1998 оны долоодугаар сарын 18-ны өдөр баталж, 2002 оны долоодугаар сарын 1-ний өдрөөс хүчин төгөлдөр үйлчилсэн байдаг. Түүнчлэн 2023 оны сүүлээр Монгол Улсын шүүгч Д.Эрдэнэбалсүрэн Олон улсын эрүүгийн шүүхийн шүүгчээр сонгогдсон билээ. Одоогоор Монгол Улс Ромын дүрэмд заасан үүргээ биелүүлэх эсэх нь тодорхойгүй байна. ОХУ-ын хэвлэл мэдээллийн хэрэгслүүд Монгол Улсыг ОХУ-ын Ерөнхийлөгчийг баривчлах магадлал маш бага гэж мэдээлжээ.

ОХУ-ын Ерөнхийлөгч Владимир Путин хамгийн сүүлд 2019 оны есдүгээр сард айлчилж, Халхын голын ялалтын 80 жилийн ойн ёслолд оролцож байсан билээ.