Энэ гарчгаас харвал аль нэгэн намын, хэн нэгэн поп гар шиг сонсогдож байна уу? Үгүй дээ. Энэ бол Энэтхэгийн цахим хуудаст гарсан мэдээлэл. Уг мэдээллийг сийрүүлбэл Энэтхэгийн засаг захиргаа дотоодын эрэлтээ хангахын тулд Орос, Монголын коксжих нүүрсийг ихээр сонирхож байгаа аж. Ялангуяа сүүлийн үед харилцаа илтэд сэргэж байгаа Монгол Улсаас коксжих нүүрс авах сонирхол их байгаа бололтой. Тус улсын “Business Line” цахим хуудаст мэдээлснээр энэ сард Энэтхэгийн Засгийн газрын хэд, хэдэн төлөөлөгч манайд айлчлах юм байна. Ган боловсруулахад хамгийн чухалд тооцогдох коксжих нүүрсийг Монголоос авснаар тус улсын зах зээлийн түнш тэлж байгаа гэсэн үг юм. Одоогийн байдлаар Энэтхэг коксжих нүүрсний тал дээр Австралиас хараат хэвээр байна. Ихэнх хувийг Австралиас авдаг ч зүүн өмнөд азийн хэдэн улс байгаа ч Энэтхэгийн эрэлтийг хангахад хангалтгүй байгаа юм. Газар зүйн байршлын хувьд ч Монгол Улс таатай байршилд байдаг. Австралиас коксжих нүүрс авснаас өртөг хямд тусах тул Энэтхэг улс коксжих нүүрсний салбарт хамтран ажиллах боломжийг судалж байна.

Мөн дээрх цахим хуудаст мэдээлснээр хэдхэн хоногийн өмнө тус улсын аж үйлдвэрийн салбарын томоохон төлөөлөгчид манайд айлчилжээ. Энэтхэгийн Засгийн газар ОХУ-тай гэрээ байгуулж коксжих нүүрс авч байгаа. Харин энэ удаад Монгол Улсаас коксжих нүүрс авах боломжоор хангачихвал Австралиас хараат байдлаас сална гэж дүгнэж байна. Австралийн хувьд байгаль цаг уурын онцлогоос шалтгаалан ган гачиг, үер, гал түймрийн аюул жил бүр заналхийлж заримдаа байгалийн давагдашгүй хүчин зүйлээс шалтгаалан нийлүүлэлт тасалдаж байсан удаатай.