Соёлын яамны урилгаар Испанийн хөлбөмбөгийн Барселона клубийн ерөнхийлөгч Жоан Лапорта Монгол Улсад хүрэлцэн ирээд байна. Алдарт хөлбөмбөгийн клубийн төлөөлөгчийн газар байгуулах, тоглогчид бэлтгэх талаар хэд, хэдэн төсөл хэрэгжүүлэхээр ирээд байгаа юм. Ингээд түүний тухай сонирхолтой баримтуудыг хүргэе.

Хуульч



Барселонын их сургуулийг хуульч мэргэжлээр төгссөн. Төгсмөгцөө нутгийн удирдлагын хэд,хэдэн байгууллагын хуулийн хэлтэст ажиллаж байгаад Лапорта Арбос хуулийн фирмийг үүсгэн байгуулсан.

Улстөрч



Лапорта нь 2010-2012 онд Каталон мужийн парламентын гишүүн, 2011-2015 онд Хотын зөвлөлд төлөөлөгчөөр ажиллаж байсан. Нэгэн цагт Тусгаар тогтнолын нам болон Каталонын ардчилсан намын гишүүн байсан нэгэн.

Клубийн ерөнхийлөгч



Испанийн алдарт Барселон клубийг тэрээр хоёр ч удаа удирдсан юм. Тэрээр 2003-2010 онд багийн дотоод уур амьсгал тогтворгүй байхад удирдаж чамгүй амжилт гаргав. Харин 2021 онд ерөнхийлөгчийн сонгуульд ялалт байгуулан түүнээс хойш удирдсаар байна.

Амжилт ялалтууд



Тэрээр тус клубийн түүхэн дэх хамгийн агуу удирдагчдын нэг. Лапортагийн удирдлаганд Барселон клуб 92 цом хүртсэний хоёр нь Аваргуудын лигийн цом байсан билээ.

ЮНИСЕФ-ийн гэрээ

Тэрээр клубийн удирдлаганд байхдаа НҮБ-ын Хүүхдийн сантай хамтран ажиллах гэрээ байгуулж, өмсгөлийнхөө урд тус байгууллагын логог байршуулан олсон орлого бүрээс тодорхой хэмжээний санхүүжилтийг олгож байхаар болсон юм.

Орлого



Барселон клуб яг одоогийн байдлаар дэлхийн хамгийн өндөр үнэлгээтэй гурван багийн нэг. Тус клубийн нийт үнэлгээ 5.6 тэрбум ам.доллар. Жилийн орлого нь 800.1 сая еврогоор хэмжигдэж байна. Жоан Лапортагийн орлого ч мөн адил дагаад өссөн. OPCB цахим хуудаст мэдээлснэээр түүний хөрөнгө 100 сая ам.доллар ажээ.