Японы алдарт Киодо мэдээллийн агентлаг тус улсын Засгийн газар Монгол, Филиппин зэрэг дөрвөн улсад батлан хамгаалах төхөөрөмж нийлүүлэх болсныг мэдээллээ. Тэр дундаа Монгол Улсад агаарын хөдөлгөөнийг хянах төхөөрөмж нийлүүлэх юм. Тухайлбал Монгол, Филиппин, Индонези, Жибути зэрэг улсын батлан хамгаалах салбарыг чадавхжуулахын тулд үнэт зүйлийн хувьд ижил төстэй улс орнуудад батлан хамгаалах төхөөрөмж нийлүүлж буй юм байна.

Япон улс санхүүгийн жилийн төсөвт дээрх тусламжийн хүрээнд нийт 5 тэрбум иен буюу 33 сая ам.доллар төсөвлөжээ. Эх сурвалжийн мэдээлснээр Японы тал Монгол Улсад агаарын хөдөлгөөнийг хянах төхөөрөмж,  Филиппинд радарын төхөөрөмж, Индонези, Жибути улсад тэнгисийн цэргийн төхөөрөмж нийлүүлэх юм.

Ташрамд дурдахад 2022 оны арваннэгдүгээр сард Япон улсад болсон дээд хэмжээний уулзалтын үеэр хоёр улс аюулгүй байдлын хамтын ажиллагааг сайжруулахын тулд батлан хамгаалах салбарт хамтын ажиллагааг өргөжүүлэхээ мэдэгдсэн билээ. Хэдийгээр өнгөрөгч наймдугаар сард Японы Ерөнхий сайд Монгол Улсад айлчлахаар төлөвлөж байсан ч улс оронд нь үүссэн шалтгааны улмаас айлчлал цуцлагдаж байсан юм. Цуцлагдсан энэхүү айлчлалын хамгийн гол сэдэв нь батлан хамгаалах салбарын хамтын ажиллагаа байсныг Японы хэвлэлүүд онцлон мэдээлж байсан билээ.